Robert Romawia thubuai chhui turin ngen

Society for Social Action (SOSA) chuan Inrinni khan chief minister Lal Thanhawla hnenah, Robert Romawia Royte thubuai chhui chiang leh tura ngenna an thehlut a; sorkar hna a thawhlaia dan kalha sumdawnnaa inhmangah an puh.

SOSA aiawh hian president SL Sailova leh treasurer Bualhranga-te'n chief minister hnenah hian lehkha an thehlut a; kum 2010-a Robert Romawia chhui tura FOMTU, SOSA leh PRISM-in sorkara an thlen hnua chhui a nih dan leh hrem a nih zui loh dan chu chhui nawn an phût a ni.

SOSA-in Chief Minister hnena lehkha an thehluha a lan danin, Robert Romawia hi Mizoram sorkara Education department hnuaia a thawhlaiin Nagaland sorkar ngenna angin Mizoram sorkarin Nagaland sorkar puih phalna a pe a, officer pakhat nen an pui a ni. Robert Romawia chu Nagaland a thlen hnuah, January 6, 2010-ah a company leh NECS leh Nagaland Education Mission Society (NEMS) chuan RMSA project siam turin inremna an ziak a ni.

Inremna chu siamṭha lehin, June 25, 2010-ah inremna an ziak leh a, NECS aiawhin chief managing director Robert Romawia Royte leh Nagaland sorkar aiawhin state mission director Angau I Thau-in hming an ziak. Robert Romawia'n ACB hnena a sawi dan chuan, inremna aṭangin cheng nuai 550 a dawng.

SOSA chuan, Robert Romawia chu sorkar hna sumdawnna atana hmangah puhin, "Hei vang hian ACB report chuan Robert Romawia hian CSS Conduct Rules, 1964 to Financial Rules & Supplementary Rules 11&12 a bawhchhiaah puhin, sorkar hnathawkin fee a dawn theih zat bituk aia tam a dawn avangin Chief Vigilance Officer hnenah departmental enquiry la turin a recommend a, chu chu Mizoram sorkarah a thlen a ni," an ti.

SOSA chuan, Chief Vigilance Officer hnena ACB thu thlen chuan bawhzui a hlawh lo tih sawiin, "Action lak zui awm loin Pu Robert Romawia Royte bànna chu Vigilance clearance awm lo chunga pawm a ni," an ti a; Robert Romawia thubuai chu ennawn leh turin Chief Minister an ngen a ni.

SOSA chuan Robert Romawia chu sorkar hnathawk ni chunga dan phal baka sum siamah an puh a; Mizoram sorkarin Nagaland sorkar pui tura a tihna chu dik lo taka hmanga NECS hminga cheng nuai 26,362,36 siamah an puh a, sorkar hnathawk ni chungin NECS chief managing director angin inremnaah hming a ziak bawk niin an tarlang.