PWD-a thawk tura MES lak dan Engineer leh zirlai pawlin dodal

Department of Personnel & Administration Reforms (DPAR) additional secretary Lalrinsanga'n November 5, 2020-a hriattirna (notification) a chhuah danin, MES Rules, 2013-a Rule 34-in a phal angin, BDA-a assistant engineer (Civil) Zosangliana Ralte chu MES Rules 22(6)(a)(1) hnuaiah 'one time relaxation' hmangin MES Junior Grade (Public Works cadre) (Civil Wing)-a awm tura tih a ni.

DPAR notification-in a tarlan danin, Zosangliana Ralte, PWD-a thawk tura MES atana lâkna (absorption) chu MPSC kaltlanga tih a ni dawn a, MES-ah junior ber a ni ang a, BDA-a a thawh tawh chu seniority-ah chhiar tel a ni lo ang. Hemi chungchangah hian MPSC chu ràwn a ni tawh nia tarlan a ni a; relaxation chhan erawh chiang taka tarlan a ni lo.

MIPESA chuan November 12, 2020 khan PWD Engineer-in-Chief hnenah lehkha thawnin, BDA hnuaia thawk, PWD-a a ngheta thawk tura direct-a lâk chungchangah an duh dan anga a ṭul anga hma la turin an ngen a ni.

MES, PWD cadre (Civil Wing)-a awm turin tun hnaiah BDA aṭangin absorption tih a nih thu tarlangin MIPESA chuan, "MES Rules 2013 (Amended 2017) No. 22(6)(a)(1) angin 65% of MES Junior Grade chu competitive exam leh personal interview MPSC buatsaih paltlanga lak tur a nih laiin, MPSC buatsaih examination paltlang hauh loa absorption tih a ni ta mai hi hriatthiam har kan ti hle a. Hei hian kan service hlutna leh zahawmna nasa takin a tichhia a ni," an ti.

MIPESA chuan, "MES Rules ang thlap leh MPSC buatsaih competitive examination pal­tlang loa hna lak (recruitment) tih a nih chuan, kan service bakah, ram hmasawnna thawktu leh kutke ber engineer-te zingah a ṭha leh thiam thlang loin, a ti thei apiangte dinchanna tur atan PWD hi kan siam mai ang tih kan hlau hle," an ti a; ram hmasawnna dâltu leh tiṭhuanawptu lian tak bul ṭanna nia an hriat thu an tarlang.

"MES Rules kalha absorption ti tura hmalakna awm mek hi tihtawp a nih theih nan leh, tun hnu zelah pawh hetiang thil hi a thlen tawh lohna tura hma min laksak turin kan ngen tak meuh che a ni," tiin, MIPESA chuan PWD E-in-C hnenah ngenna an thlen a ni.

MZP pawhin competitive exam awm lo leh personal interview kaltlang loa BDA aṭanga PWD-a thawk tur dah ngheh chu duh lo a, bawhzui an tum. Vanglaini palai zawhna chhangin MZP general secretary Lalnunmawia chuan, "Kan duh lo a, thil ṭha a ni lo. Naktuk (Thawhṭanni)-ah kan bawhzui dawn a, thil awm dante kan zir chiang phawt ang," a ti.

MES Rules, 2013 Rule 34-ah chuan, mipui vantlang (public service) tana ṭul leh ṭha leh, mamawhna bik riau (particular case) a awm a nih chuan, Com­mission (MPSC) ráwn chungin Governor thuneihna hmangin MES Rules hnuaiah ngaihnathiamna siam theih a ni, tih a ni.

Rule 22(6)(a)(1)-ah chuan, cadre/wing (PWD, PHE, P&E, Minor Irrigation) tina MES junior grade hna (post) ruaka 65% chu MPSC buatsaih competitive examination leh personal inter­view kaltlanga lak tur a ni a; 35% chu kaisanna (promotion) atan dah a ni thung.

Competitive exam hmanga lak tur 65% zinga 3% chu rualbanlo (persons with disabilities - PwD)-te tan hauh a ni a; promotion quota 35% luah khat tura dil theite chu junior engineer (JE) emaw, draftman grade-I kum 5 a ngheta thawk tawhte tan niin, departmental exam paltlanga hnawhkhah tur a ni.

Hetih lai hian, October 21, 2020 khan MPSC buatsaih MES competitive examination-a final result tih chhuah a ni a, chutah chuan mi 17 an tling a, panel list-ah mi 16 an awm. Tling mi 17 zinga pakhat chu PwD a ni. MPSC-in MES junior grade tur a lâk tharte leh panel list-a awmte zingah Zosangliana Ralte a tel lo.

Thu dawn danin, Zosangliana Ralte hi MPSC kaltlang loin BDA-a contract-a thawk tura kum 2012 a lâk, absorption hmangin kum 2018-a dah ngheh (regularised) a ni.