COVID-19: Mizoram dinhmun Hripui vei 84 hmuh belh a ni

November 13-14, ni hnih chhungin Mizo­ramah Covid-19 hripui vei mi 84 hmuh chhuah an ni a; Inrinni leh nimin khan hripui laka fihlim tawh mi 63 chhuahtir an ni thung.

November 13, Zir­tawp­ni khan Covid-19 vei mi 59 hmuh chhuah an ni a; ZMC laboratory-a hmuh mi 17, TrueNAT-PCR hmanga hmuh mi 14 leh Rapid Antigen Test (RAT) hmanga hmuh mi 28 an ni. Inrinni khan mi 25 hmuh chhuah leh an ni a; ZMC-a hmuh mi 20, TrueNAT-PCR hmanga Serchhipa hmuh mi pakhat leh RAT hmanga hmuh mi pali an ni.

Hripui laka fihlim tawh Inrinni khan mi 63 chhuahtir an ni. IPR department tarlan danin, Inrinni khan mi 28 an chhuak a, niminah mi 35 (Gilead Special School aṭangin 33 leh Champhaiah 2) an chhuak leh bawk. SRH-ZMC Bulletin tarlan danin, nimin khan SRH-ZMC aṭangin mi pathum an chhuak a, hei hi IPR tarlanah a tel lo thung.

Mizoramah Covid-19 positive mi 3,393 hmuh chhuah a ni tawh a, mipa 2,525 leh hmeichhia 868 an ni. Nimin tlai dar 5 thleng khan mi 2,855 (84.14%) chhuahtir an ni tawh a, mi pali (0.11%) thi tawhin, enkawl mek mi 534 (15.75%) an awm.

Mizorama hripui vei hmuh tawhte zinga mi 1,536 chu Mizoram chhunga kái an ni a, mi 1,857 chu state páwn aṭanga rawn lut an ni.

November 13-14 khan Mizoramah swab sample 1,723 endik a ni a; chu'ngte chu ZMC-a endik 916, TrueNAT-PCR hmanga district hrang hranga endik sample 209 leh, RAT hmanga endik sample 598 a ni.

ZMC-a mi 575-te swab sample endik aṭangin Covid-19 positive 17, mipa 11 leh hmeichhia paruk hmuh chhuah a ni a, Aizawl district-a sample lak vek niin, kum 11-62 inkar an ni. An zinga mi 13 chu tualchhunga kái an ni a, mi pali chu state pawn aṭanga rawn lut thar an ni thung.

Sorkar thuchhuah tarlan danin, Mizoram páwn aṭanga rawn lutte chu - Mizoram University-a awm mipa kum 34, Odisha aṭanga rawn lut te, Chawlhna Hotel, Zarkawta awm mipa kum 62, Imphal aṭanga rawn kal te, Chawngtea mipa kum 28, Delhi aṭanga rawn haw leh, Zokhawsanga awm Assam Rifles sipai kum 55 mite an ni a; khung hranna hmuna awm lai, symptom nei lo vek an ni.

TrueNAT-PCR hmangin Mamit District Hospital-ah hripui vei mi pathum hmuh chhuah a ni a; mipa kum 39, 53 leh 58 mi, 4th IR sipai, Mamit Luangpawla awm, Bihar Assembly inthlana duty-na aṭanga haw hlimte an ni. Symptom an nei vek niin sorkar thuchhuahin a tarlang.

Khawzawl Hospital-ah pawh Covid-19 positive mipa 11, kum 22 leh 60 inkar hmuh chhuah an ni a; 2nd IR batallion, Khawzawla awm, Bihar inthlana an duty-na aṭanga rawn haw ve ve niin, symptom an nei lo.

RAT hmanga hripui vei hmuh chhuah mi 28-te chu mipa 23 leh hmeichhia panga an ni. Hmeichhia pali chu tualchhunga kái vek an ni a; mipate chu state páwn aṭanga rawn haw tharte vek niin, mi 22 chu Bihar inthlana duty police an ni.

State páwn aṭanga rawn lut zinga pakhat chu Saitual Chhimvenga mipa kum 33 mi, Manipur aṭanga haw a ni a, symptom a nei lo. Tuikhuahtlanga hmeichhia kum 50 mi chu Delhi aṭanga haw, Lengpui Airport-a lo hmuh chhuah a ni a, symptom a nei lo.

Bihar inthlana duty police mi 22-te chu - Aizawla sample endik mi 12 leh Lungleia sample endik mi 10 an ni. Aizawla hmuh chhuahte chu - 1st Bn. MAP mi mipa 11, kum 31-55 inkar leh Lungverha awm 5th IR police kum 41 mi an ni a; 1st MAP-a mi 10-in symptom an nei a, pakhatin a nei lo a, Lungverha awmin symptom a nei lo. 2nd MAP, Lunglei Luangmuala awmte chu mipa 10, kum 33-56 inkar an ni a, symptom nei lo vek an ni.

Mizoram chhunga káite dinhmun chiang zawk chu table-ah tarlan a ni.

ZMC-a mi 341-te swab sample endik aṭangin Covid-19 positive 20, mipa 16 leh hmeichhia pali hmuh chhuah a ni a, Aizawl district-a sample lak vek niin, kum 12-62 inkar an ni. An zinga mi pakua chu tualchhunga kái an ni a, mi 11 chu state páwn aṭanga rawn lut thar an ni thung.

Bung Bangla quarantine facility-a awm hripui vei hmuh chhuah mi pariat zinga mipa paruk, kum 18-47 inkar chu Shivalaya construction company hnuaia thawk, Mizoram páwn aṭanga rawn lut an ni a, symptom nei an awm lo. Hmeichhia pahnih hmuh chhuah chu tualchhunga kai an ni.

Thingsulthliaha BRO camp-a khung hran mek zingah mipa pali, kum 31, 34, 48 leh 49-te chu Covid-19 positive an ni tih hmuh a ni a; symptom an nei lo. New Capital Complex-a awm mi pakhat kum 20 chu Karimganj, Assam aṭanga rawn lut, quarantine facility-a awm lai a ni a, symptom a nei lo.

TrueNAT-PCR hmanga endik mi 84 zingah Serchhip District Hospital-ah hripui vei mipa kum 44 mi hmuh a ni a; Tantia Construction hnuaia thawk, Kolkata aṭanga rawn lut, symptom nei lo a ni.

RAT hmanga endik mi 152 zingah Covid-19 positive mi pali hmuh chhuah a ni a; Aizawl leh Lungleiah pakhat ve ve leh Lawngtlaiah mi pahnih an ni. Tualchhunga kái vek an ni a, an dinhmun kimchang chu table-ah tarlan a ni.