Hri léng karah ZPM a kal zel - ZPM Vice President

Zoram Peoples' Move­ment (ZPM) vice president K Sapdanga chuan, hripui léng vangin Mizoram hmun hrang hrang aṭanga mite auhna chháng thei lo mah se, hri léng karah pawh ZPM an kal zel thu sawi.

ZPM thuchhuah tarlan danin, November 14, Inrinni khan East Tuipui bialah ZPM zawm thar eng emaw zat lawm luh an ni a, Aizawl East-I biala Falkland Vengah ZPM unit thar din a ni bawk. Hemi chungchangah hian ZPM Vice President chuan thuchah a tichhuak a ni.

ZPM Vice President chuan, kalphung thar, mipui sorkar din duha tuihâl Mizoram hmun hrang hrangah an pung zel tih sawiin, "Hmun hrang hrang aṭanga min rawn auhna chháng thei rih lo mah ila, hri léng karah pawh ZPM-in kallai a kham lo a ni," a ti.

MLA inthlan nan kum thum la awm mah se, mipuiin ZPM-ah rinna an nghat tih sawiin K Sapdanga chuan, "ZPM hruaitute kan fel vang leh kan ṭhat bik vang emaw, kan remhriat bik vangte ni loin, chung lam hnathawh liau liau a ni," a ti a; an party zawm thar an pun nasat thu a sawi.