Hripui vei hmuh thar 84 zingah Tualchhunga kái mi 30 an awm

November 13-14, ni hnih chhunga Mizorama Covid-19 vei hmuh chhuah mi 84 zingah Mizoram chhunga kái mi 30 an awm a; hri kai ṭanna hriat chian theih loh mi pali leh natna lang chhuak mi pariat an awm bawk.

Sorkar thuchhuah aṭanga a lan danin, November 13-a hripui vei hmuh chhuah mi 59 zingah tualchhunga kái mi 17 an awm a, Aizawla veng pasarih leh Aizawl páwna khaw pahniha mite an ni. Mizorama kai mi 17 zinga pakhatin symptom a nei a, hri kai ṭanna hriat loh pakhat a awm.

November 14-a Covid-19 positive hmuh chhuah mi 25 zingah tualchhunga kái mi 13 an awm a, Aizawla veng/hmun paruk leh Aizawl páwn lam mi pakhat an ni. Tualchhunga kái mi 13 zingah kaina hriat chian theih loh mi pathum an awm a; Covid-19 symptom nei mi pali an awm bawk.