Vairengte naupang bo la hmu lo

November 11, 2020 aṭanga chin hriat loa awm Lalsiamthara (kum 2 leh a chanve) s/o C Zothanmawia, Vairengte chu he thu ziah lai thleng hian hmuh a la ni lo a; khawtlangin Vairengte leh Laila­pur leh a chhehvelah an la zawng zel.

Thu dawn danin, Lalsiamthara hi a pa C Zothanmawia'n an ṭhenawma mipa naupang pakhat nen a chhuahpui a, Lailapur panna NH kawngpui aṭanga tlak lam hla vak loa thlám pakhatah dahin, thlámah chuan lo awm tura hrilhin a kalsan a ni. Thláma a lêt leh chuan a fapa chu a lo awm tawh lo a, an ṭhenawm naupang pawhin a awmna chin a hre lo.

Lalsiamthara a bo tih hriat a nih hnuah zawn nghal a ni a, a pain a kalsanna chu Lailapur lam hnaih a nih avangin Inrinni khan Lailapur leh Vairengte khawtlang chuan inthurualin an zawng. Ruahman dan chuan, khawtlang huapin Mizo danin ni sarih chhung zawn a ni ang a, ni sarih chu naktukah a tàwp dawn a ni.