Covid-19 vei thi mi 2 an awm belh Mizoramah hripui vei mi 4 an thi tawh

Mizorama Covid-19 vei vanga enkawl mek zinga pahnih chu tun hnai ni hnih chhungin an thi. Heti hian state chhungah hripui vei thi mi pali an awm ta.

State Referral Hospital (ZMC)-a Covid-19 positive awm mek zinga ICU-a enkawl lai Lalthanga (70), Dinthar, Aizawl chu November 13, Zirtawpni zan dar 10:40 khan a thi. Amah hi October 22, 2020-ah a hritlang ṭan a, October 28-ah RAT hmanga a swab sample endiknaah Covid-19 positive a ni tih hmuh chhuah niin, tlaiah SRH-ah dah nghal. November 1-ah ICU-ah dah luh a ni a, November 4 aṭangin ventilator hmanga enkawl a ni.

Lalthanga awmna veng, Dinthar hi containment zone-a puan lai a nih avangin a ruang chu a thih zan hian SRH-a mitthi dahnaah dah a ni a, Inrinni zing khan khawtlang leh an chhungte'n la chhuakin, Inrinni chawhma dar 10-ah Dinthar thlànmualah vui a ni.

November 14, Inrinni zan dar 11:30 khan SRH-ZMC ICU-a Covid-19 vei enkawl mek dang K Lalnuntluanga (34) s/o Dr K Lalremmawia, Durtlang chu a thi. A ruang hi an inah lâk luh a nih loh rualin, Inrinni zan khan an inah tlaivar a ni a, nimin chawhma dar 10 khan MC Hall-ah bialtu pastor-in a vui.

A chanchin ziahnaa an tarlan danin, K Lalnuntluanga hian a nu leh pa bakah, a unaute pathum, a nupui Vanlalsangi leh an fanu kum 4 mi a kalsan a; a nupui hian nau a pâi mek bawk.

October 18, 2020 khan kawṭhaloin a tlakbuak a, a hnuah hnate pawh a thawk zui leh thei a; October 27 khan zing dar 5 velah a chau thut a, Synod Hospital-ah dah luh a ni a, zunthlum leh pneumonia a nei tih hmuh chhuah a ni bakah, RAT hmangin Covid-19 positive a ni tih hmuh chhuah a ni. SRH-ZMC-ah lak nghal niin, ICU-ah enkawl nghal a ni a; Inrinni zan khan a thi ta a ni.