AR-in Zokhawsanga insawn turah MHA aṭangin thu thar an dawng lo

Aizawl khawpui lailía awm Assam Rifles-te Aizawl daifém, Zokhawsanga sawn tum an nih chungchangah Aizawla Assam Rifles hotute chuan Ministry of Home Affairs (MHA) aṭangin thu dawn thar an nei lo.

Vanglaini palai zawhna chhangin Assam Rifles 23rd Sector DIG Brig. Digvijay Singh chuan, Zokhawsanga insawn chungchangah MHA aṭangin thu dawn an neih loh thu a sawi a, "Tunah hian Zokhawsang hi peih a la ni lo. Peih tawh pawh ni se, kan insawn hun tur chu MHA thu thu a ni. MHA aṭanga thu kan hmuh ang zelin keini lam chuan hma kan la ang," a ti.

Tarlan tawh angin, MHA chuan February 19, 2019 khan office memorandum tichhuakin, Aizawla Assam Rifles battalion headquarters (Lammual leh a chhevel) chu May 31, 2019 hmaa Zokhawsanga insawn tura tih a nih thu a tarlang.

MHA tarlan danin, MHA Additional Secretary (Police) kaihhruaina hnuaia February 7, 2019-a meeting thuchhuak angin, Aizawla Assam Rifles-te chu Zokhawsanga insawn tura tih an ni a; chief minister Zoramthanga pawhin March 1, 2019 khan Lammuala Chapchar Kût lawmnaah Lammual chu May 2019 hnu lamah chuan Mizoram sorkar ta a ni tawh dawn thu a puang a ni.

CM Zoramthanga chuan, Chapchar Kût hmanna Lammual chu Assam Rifles hnen aṭanga hman hawh a nih thu sawiin, "May (2019) thla hnu aṭang chuan, Pathianin rem a tih chuan heng ram, heng hmun zawng zawng hi kan ta a ni dawn tawh a ni," a ti a; "Ka suangtuah dan chuan, Assam Rifles hmunah hian ruahsûr leh nisáin a tihbuai theih loh turin a chung nei, mi sing bî kan len theihna tur siam kan tum," a ti bawk.

Mizoram sorkar hotute chuan Assam Rifles sawn chhuah chungchang hi sorkar laipuiah an bawhzui reng a, CM Zoramthanga pawhin New Delhi-a zin hnuhnun ber ṭum, November 22, 2021 pawh khan Union Home minister Amit Shah hnenah AR sawn chhuah chungchang a sawipui a ni.

Hetih lai hian, Assam Rifles chuan MHA aṭanga thu an hmuh loh avangin Aizawla an hmunhmate an la chhuahsan lo a; AR mi ṭhenkhat erawh chu hun eng emaw chen Zokhawsangah an awm tawh thung.