SEDP hi ram hmasawnna atan a ni - Deputy Chief Minister

SEDP Executive Board chu a ṭum khatna atan nimin khan Assembly Annexe conference hall-ah an ṭhukhawm. Chairman Tawnluia, deputy chief minister chuan, SEDP chu mipui dâwm kânna tur leh ram hmasawnna tura duan a nih thu a sawi.

Tawnluia chuan, SEDP bul ṭan tawh chu chhunzawm zelin, mimal leh chhungkua thleng tur scheme leh programme sawiho nan board meeting neih a nih thu a sawi a, "Covid hripuiin kum hnih min tuam avangin duh anga chakin hma a lak theih loh a, a pawi hle. Sorkarin sum a neih dan ang zelin SEDP hi theihtawp chhuahin mipui leh ram hmasawnna leh changkanna atan kan kalpui dawn," a ti.

Sorkar kum tharah SEDP hmangin chhung­kaw 60,000 vel tuam tum a nih thu sawiin Dy Chief Minister chuan, "Hemi atan hian cheng vbc. 300 vel ruahman a ni dawn a, hei hi a thawh khatna tur a ni," a ti a; sum neih dan azirin SEDP an kalpui zel dawn thu a sawi.

Board vice chairman H Rammawi, Planning Board vice chairman chuan, kum 2019 aṭangin SEDP kenkawh leh kalpui dana Planning Board-in hma an lak dan a sawifiah.

SEDP Executive Board-a tel MLA-te chuan, an biala SEDP hmalakna atana pawimawh leh ṭul nia an hriatte leh rawtna an neihte an sawi. Board-ah hian ruling MLA 14 leh department 10-a director-te member an ni.

Executive Board mawh­phurhna tlangpui chu, SEDP project hrang hrang kenkawh leh kalpui te, SEDP Governing Board-in policy a siamte bawhzui leh tihhlawhtlin te, SEDP Governing Board-in sum a ruahmante hman dan tur duan te, SEDP kalpui dan tur ruangám leh inkaihhruaina hrang hrang siamte a ni.