MJA tan a thlàwna inentirna buatsaih

Civil Hospital, Aizawl chuan nimin khan Mizo­ram Journalists' Asso­ciation (MJA) General Headquarters member-te tan a thlawna inentirna, free medical check-up a buatsaih ṭan.

Free medical check-up ṭanna inkhawm tawi, Doctor's Seminar Room-ah hman a ni a, Aizawl Civil Hospital (ACH) medi­cal superintendent Dr Lalhmuchhuaka'n kai­hruaiin, MJA member-te hriselna dinhmun enfiah tura an inbuatsaih dante a sawi.

MJA president Zonunsanga Khiangte chuan, kum 2009 aṭangin MJA member-te hriselna endik ṭan a nih thu sawiin, kum khat leh a chanve vel danah zel buatsaih ang a nih thu a sawi a; Civil Hospital-in MJA member-te tana a thlawna inentirna a buatsaih ṭhin avangin MJA member-te an lawm tak zet tih a sawi.

Hawnna inkhawmah hian ACH Psychiatry head of department Dr C Lalhrekima'n inentir dan tura ruahmante a sawifiah a ni.

MJA free medical check-up ah hian a ni khatna, nimin khan MJA member 30 vel an inentir a, vawiin leh naktukah chhunzawm a ni ang. ACH chuan MJA member-te chu thisen test chi hrang hrang, x-ray, ultrasound, electro cardiogram (ECG) leh echocardiogram-te a thlàwnin an tihsak vek a; a ṭul angin taksa enfiahna dangte pawh hman a ni dawn a ni.