KHAWTHLIR

DC leh SP-te Khauh turin chah
Covid-19 Task Group on Monitoring of CAB & COVID-19 Restrictions chuan, district tina DC leh SP-te chu February 1-15 chhungin khauh taka Covid-19 CAB No Tolerance Drive kalpui turin a hriattir a; district administration, police leh local task force-te chu theihtawp chhuaha ṭangho tur leh district tina Disaster Management Authority-te chu an bialah executive duty tuai thar turin a hriattir bawk.

Assembly jubilee
Mizoram Legislative Assembly Golden Jubilee Organising Committee chu an chairman Lalrinliana Sailo, Assembly speaker hoin nimin khan Assembly Secretariat-ah an ṭhukhawm a, ruahmanna hrang hrang thlirin, inbuatsaihna kalpui dan tur an sawiho. Assembly Golden Jubilee hi May 10, 2022-ah lawm tum a ni.

BJP-in ṭanpui
BJP, Mizoram Pradesh president Vanlalhmuaka chuan nimin khan Dampa constituency-a khaw ṭhenkhat tlawhin, Covid-19 léng vanga harsatna an tawhte a hmunah a enpui a; Lungphun khawtlang tan Covid swab test kit 100 leh Rs 5,000 a hlàn.

Minister-in enfiah
Siaha bialtu MLA Dr K Beichhua, minister of state chuan Thawhṭanni leh nimin khan Palak bial khawthlang lam a tlawh a, Siaha District Covid-19 Food Security Consultative chairman a nih angin, an hmalaknate a hmunah a enfiah. Consultative hian nikum leh kum hmasa lam khan Siaha district-ah leilet hectare 550-a zau a thlâwnin lei a lehsak a, hei vang hian an buh thar a pun phah niin leilet neitute chuan Dr K Beichhua chu an lo hrilh a ni.

Kângmei ven hapta
Mamit District Fire Prevention Committee buatsaihin nimin khan DC conference hall-ah Fire Prevention Week hawn a ni a, district bawrhsap Lalnunhlua'n a hawng. Lalnunhlua chuan, ram kâng ven kawngah tlawmngai pawl leh thuthar thehdarhtute zarah tih theih tam tak a awm thu leh kângmei ven chu mi tin mawhphurhna a nih thu a sawi.