Zophaiah Assam Police an rawn lut ; Boruak sosang awm loin an kîr leh

Nimin khan Bairabi Zophaiah Assam police leh civil mi ṭhahnem tak an rawn lut a, Kolasib bawrhsap Dr H Lalthlangliana chuan lo ep turin Mizoram police-te a hrilh ve nghal. Mahse, Assam police-te chu an lêt avangin boruak sosang a awm zui lo.

Kolasib DC-in thuthar thehdarhtute a hrilh danin, Assam police 50 vel leh civil mi ṭhahnem tak chu nimin chawhma dar 11 vel khan Zophai huam chhungah an lut tih report an dawng a, Mizoram police hotute chu enfiah tura hrilh nghal an ni.

Dr H Lalthlangliana chuan, telephone hmangin Hailakandi DC a biak nghal thu sawiin, "Inrinni kal ta maiah Bairabi-ah kan inbia a, a tu ve ve mahin boruak chhe zawngin thil i ti rih lo ang kan ti zo chauh. Eng vangin nge in rawh luh? In in withdraw loh chuan sipai kan rawn tir ve nghal dawn a, nangmahni mawhphurhna a ni ang. Kan ram chhung Zophaia in rawn luh hrim hrim hi a rem lo," tia a hrilh thu a sawi.

Hailakandi DC chuan Zophai area-ah ram vât an awm thu report an dawn avanga enfiah tura kal an nih thu Kolasib DC chu a hrilh a; Kolasib DC chuan, ram vât awm leh awm loh enfiah tur ringawta police tam tak tirh a ṭul loh thu leh police a tirh ve nghal tur thuin a chháng.

A hnuah Hailakandi DC hian Kolasib DC chu telephone hmanga be lehin, lo vah a nih leh nih loh enfiah mai an nih thu leh an in withdraw nghal thu a hrilh a ni.

Bairabi khaw mi ṭhahnem tak chuan Zophaiah lo atan ram zau ang reng tak an vât a, mau chìnna atan hman an tum a ni. Nimin thleng khan ṭín 70 hmun vel vah a ni tawh a, ni hnih khat emaw lekah chuan an vah zawh mai an inrin thu an sawi.