District tin tan khum 50 leh khum 10 awmna tur AYUSH hospital dil mek

Mizoram State AYUSH Society Governing Body chu an chairman Dr R Lalthangliana, Health minister hoin nimin khan Secretariat conference hall-ah an ṭhu. Minister chuan, Ministry of AYUSH hnenah district hrang hranga khum 50 leh khum 10 awm theihna tur AYUSH hospital thar dil mek a nih thu a sawi.

Dr R Lalthangliana chuan, AYUSH chu sorkar laipuiin a ngaih pawimawh avangin Mizoramah hmasawnna hna pawh chak takin a kalpui theih tih sawiin, "Tun dinhmunah district hrang hrang tan hospital thar, khum 50 awm theihna tur leh khum 10 awm theihna tur dil mek a ni a, Ministry of AYUSH chuan heng ruahmannate hi a pawm tawh. Heng hospital dinna tura sum ruahmanah hian thawktu rawihna tur leh bungraw mamawh leina tur pawh dah tel a ni," a ti.

Ṭhutkhawma tarlan danin, sorkar laipui duh dan angin Mizorama Health sub-centre zawng zawng aṭanga 10% chu AYUSH doctor enkawl turin Health & Wellness Centre-ah siam a ni dawn. District pariat aṭangin sub-centre 38 thlan niin National AYUSH Mission, Mizoram chuan a enkawl dawn a, sub-centre 24 chu ṭha taka kalpui a ni tawh.

Thenzawlah khum 50 awmna AYUSH Hospital a awm mek a; Lunglei, Champhai, Siaha, Lawngtlai, Mamit, Kolasib leh Serchhip district-ah khum 10 awmna AYUSH hospital a awm. Hnahthial, Tlabung, Sakawrdai, Biate, Vairengte leh Lengpui khuaahte AYUSH IPD awmin, Thingsulthliah, Haulawng, Sairang, Marpara leh South Vanlaiphaiahte AYUSH OPD building a awm bawk.

Kum 2020-21 khan Aizawl, Champhai leh Hnahthial tan AYUSH Hospital khum 50 awmna tur detailed project report (DPR) chu Ministry of AYUSH-in a thuphungin a pawm tawh a; Saitual, Hortoki leh Khawzawlahte khum 10 awmna AYUSH hospital pakhat ṭheuh sak dilna DPR thehluh pawh a thuphungin a pawm tawh a ni.

AYUSH Mizoram chuan National AYUSH Mission hnuaiah kum 2020-21 chhung khan district 11-a khaw 44-ah a thlawna inentirna, free health camp/clinic an buatsaih a, district tina childrens home zawng zawngah free health clinic a buatsaih bawk.