February ni 7 chhungin hripui vei 13,087 hmu tawh

February 7, Thawhṭanni khan Mizoramah Covid-19 vei mi 2,224 hmuh chhuah a ni a, ni khata hmuh tam ber dawttu niin, swab sample endik zat aṭanga positivity rate chu 27.37% a tling. Nimin khan hripui vei dam tawh mi 2,409 chhuahtir an ni a, Covid-19 vei mi pahnih an thi.

Covid-19 vei Thawhṭannia hmuh thar mi 2,224-te chu mipa 982 leh hmeichhia 1,242 an ni a; RT-PCR labortatory-a hmuh 432, TrueNAT hmanga hmuh 38, RAT hmanga hmuh 1,709 leh FIA hmanga hmuh 45 an ni. February thla ni sarih chhungin hripui vei mi 13,087 hmuh chhuah a ni tawh.

Mizorama district zawng zawngah positivity rate 10% chung lam vek a ni a, a sanna ber Champhai district-ah 38.24% a ni. Positivity rate 30% aia a sànna district pali a awm a, 20% chu’ng lam district dang panga a awm bawk. Posivity rate hi January 22, 2022 aṭangin 20% chung lam vek a ni.

Nimin tlai dar 5 thleng khan hripui vei dam tawh mi 2,409 chhuahtir an ni a; district tina chhuak zat chu - Aizawlah mi 1,588, Mamitah 282, Lungleiah 209, Serchhipah 108, Saitualah 93, Champhaiah 57, Khawzawlah 26, Lawngtlaiah 21, Hnahthialah 14 leh Siahaah mi 11 an ni.

IDSP record angin, Mizoramah Covid-19 vei 1,88,109 hmuh chhuah a ni tawh a, mipa 88,585 leh hmeichhia 99,524 an ni a, mipa aiin hmeichhia 10,939-in an tam zawk. Nimin tlai dar 5 thleng khan mi 1,75,904 (93.51%) chhuahtir an ni tawh a, mi 625 (0.34%) thi tawhin, enkawl mek mi 11,580 (6.15%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,88,109 chu mi 1,000 zelah hripui vei mi 171 an awm ang a ni a; mi 1,00,000 zela Covid-19 vangin mi 56 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. February 7, 2022 thlenga swab sample endik tawh 17,22,393 aṭanga RT-PCR hmanga endik zat percentage chu 20.65 a ni a, RAT hmanga endik zat chu 73.66% a tling.