Power tariff tihsan rawtnaah ZPM-in complaint an thehlut

Mizoram sorkara Power & Electricity-in kawlphetha hman man, power tariff hman mek chu 21.05%-a tisang tura Joint Electricity Regulatory Commission for Manipur and Mizoram (JERC)-a rawtna an thlen chungchangah ZPM party chuan nimin khan JERC-ah complaint an thehlût.

"SEDP hnuaia Rs 3,00,000 sem tura intiam sorkar hian power tariff tihsan aiin, subsidy siam turin kan phût a ni," ZPM party chuan an ti.

ZPM hian kawlphetha siam chhuah kawngah Mizoram sorkarin hmalakna a nei lo a, kawlphetha leina station pali-ah rate sang bika a lei chu tláwm zawka lei dan ngaihtuah ni se, an ti a; kawlphetha leina unit khata Rs 7.36 a nih laiin, hralh ve lehnaah Rs 3.47 a ni thung chu zir chian an rawt. Electricity Act, 2003-in a sawi angin generalisation, transmission leh distribution thliar hmasak an rawt bawk.

ZPM aiawha lehkha thehluttu secretary general PC Vanlalruata chuan, sorkarin mipui harsatna siam zawnga electric bill tisang tura ruahmanna a siam chu hriatthiam har an tih thu a sawi a, "Nikum pawh khan PE department chuan 41.92%-a sangin tariff tihpun a lo rawt tawh a ni," a ti.

PC Vanlalruata chuan, sorkarin nikuma power tariff 41.92%-a tihsan a rawt ṭumah pawh ZPM chuan na taka sawiselin, tihniam turin theihtawp an chhuah thu sawiin, "Government subsidy nen ṭang rualin 20.70%-a tihtlak a lo ni tawh," a ti a; kum khat pawh a ral hmaa a ngai ang bawka bill tisang tura sorkarin hma a la leh nghal chu an dem tak zet thu a sawi.

ZPM Secretary General chuan, hripui vangin mipui an rûm mek tih sawiin, "Eizawnna nasa takin a khaihlak bakah, sum leh paiah mipuite'n harsatna nasa tak an tawh mek lai hian, sorkar hi mipui harsatna sukiang tur an nih laia harsatna siam zawnga hma a la tlat hi hriatthiam har kan ti hle a ni," a ti.