Assam media bei ngam loa Mizoram media Beiah ZPM party-in MNF party an puh

ZPM party chuan, November 25, 2021 zana Delhi Assam House-a Mizoram leh Assam chief minister-te zanriah kil dun chungchangah Assam media bei ngam loa Mizoram media beiah Mizorama rorel lai MNF party an puh.

ZPM chuan nimin khan thuchhuah siamin, Mizoram CM Zoramthanga leh Assam CM Himanta Biswa Sarma ten Assam House-a zanriah an kilhonaah dan loa kuhva tawlh rutua puh leh Assam police-in an zawn mek Abu Mazumdar a tel ve chungchang media-a tichhuak hmasatu Barak Bulletin bei loin, Mizorama chanchinbu pakhat leh ZPM PAC member pakhat MNF-in press release siama an beih thu an tarlang a, “A puangzar hmasatu phai lam chanchinbu an sawi lang ngam hauh si lo hi mak kan ti hle,” an ti.

ZPM tarlan danin, Barak Bulletin-in February 5, 2022 khan, “Nikum July 26-a state pahnih ramri inchuhna avanga inkahna a thlen hnuah Assam CM Himanta Biswa Sarma leh Mizoram CM Zoramthanga te chu a vawi khat nan an inhmu a. Zoramthanga zanriah buatsaihah hian, Silchar police-in Myanmar aṭanga kuhva rah tawlh hotu lian bera rinhlelh Abu Mazumdar chu Zoramthanga ṭawiawmtu zingah a tel... Mazumdar hi kuhva rah sumdawnnaa inhmang thûk tak, Mizoram sorkar nena inhnimhnai tak niin police chuan an hria a. Zoramthanga hian eng vanga zanriah kîlnaa sáwm ve nge a nih hriat a ni lo,” tiin a tarlang a ni.

Barak Bulletin tarlan chu ZPM PAC member pakhatin social media-ah a pho chhuak a, Mizorama chanchinbu pakhatin an ziak chhâwng bawk tih sawiin ZPM chuan, “A tira ziaktu Assam media lam bei ngam si lo a, lo ziak chhâwngtute hming hmerh meuha MNF party-in a bei ta mai hi tih dan dawihzep takah kan ngai,” an ti a; ‘Barak Bulletin lakah MNF-in hma a la ve ngam dawn em,’ tiin an zawt.

MNF press release-ah, Abu Majumdar-a’n Mizoram House-ah Zoramthanga leh a ṭawiawmtute a hmuh thu te, zanriah kîlnaah pawh Abu Mazumdar ko lut turin CM Zoramthanga’n Assam CM a ngen thute tarlan a ni tih sawiin ZPM chuan, “Heti taka Mizoram CM-in Abu Mazumdar a ngaihven hi a mak ang reng hle a, sáwm lut tura Assam CM an han ngen hian ngaihtuahna a tikal thui hle a ni,” an ti.