Ráltlânte enkawl dan tur sawiho

Champhai District Committee on Myanmar Refugees chu an chairman Maria CT Zuali, district bawrhsap hoin nimin khan a vawi khat nan DC conference hall-ah an ṭhukhawm. Bawrhsap chuan district level committee leh village level committee inkarah thawhhona ṭha a awm a ṭul thu a sawi.

Maria CT Zuali chuan, Myanmar tualchhung buaina avanga himna zawnga ráltlânte chu mumal leh felfai zawka enkawl a ṭul thu sawiin, “District level committee leh village level committee-te inkarah thawhhona ṭha tak a awm a ṭul. Tun dinhmun mai bakah, nakin thlenga kan awm zel dan turte thlir chunga ngaihtuahna sên a ngai,” a ti a; kum khat chuang ráltlânte buaipuia hma latu YMA Sub-Hqrs, Champhai, tlawmngai pawl dang leh kohhran leh mimalte hmalakna lawmawm a tih thu

a sawi.

Ráltlânte chanchin kimchang chhinchhiahna leh identity card pek tur chu India khua leh tui nihna tur a nih loh thu sawiin Bawrhsap chuan, “Ráltlan dik tak, India rawn bêlte tana inkaihhruaina mumal zawk siamna tur leh chhawmdawlna buaipuinaa hmalakna pawimawh tak a ni. India ram an rawn belh chhan ang ngeiin ram dan leh inkaihhruainate ṭha taka an zawm theihna tura dan leh hrai inzirtirna huap zau thei ang ber neih a ni ang,” a ti.

Ṭhutkhawmah hian ráltlânte enkawlnaa hmalakna kalpui dan leh hmachhawpte sawiho a ni a; ráltlân awm tamna khuaah YMA Sub-Hqrs Legal Cell leh police ṭangkawp buatsaihin legal awareness campaign neih ni se, dan leh hraite village level committee kutah pek chhuah vek ni se an ti.