Aizawl district-ah critical PS 10 a awm ; PS 50-ah webcasting tih a ni dawn

Aizawl district election officer (DEO) Dr A Muthamma, Aizawl DC ni bawk chuan, November 28, 2018-a Mizoram Assembly inthlanpui neih turah Aizawl district-ah chuan polling station ven uluk ngai zual (critical polling station) 10 a awm thu a sawi a; polling station (PS) 50-a vote thlak lai live-a tihchhuah (webcasting) a ni dawn tih a sawi bawk.

Aizawl DEO Dr A Muthamma hian nimin khan a pisaah thuthar thehdarhtute a kâwmnaah zawhna chhangin, Aizawl district-a Assembly constituency 14-ah critical polling station 10 a awm thu a sawi a, "Critical PS-te hi uluk lehzuala vil a ni dawn a, venhimna uluk bika tih a nih dawn bakah, video coverage tih a ni ang," a ti.

Aizawl DEO sawi danin, Aizawl district-a critical PS-te chu - Tuivawl constituency-a mi Ṭinghmmun, Sunhluchhip, Sailutar, Zokhawthiang, Ratu-I leh Ratu-II, te a ni a; Chalfilh biala NE Tlangnuam, Phuainuang-I, Phuaibuang-II leh Daido khuate a ni bawk.

Aizawl Bawrhsap chuan, Aizawl district-a polling station 328 zinga 50-ah mipuiin vote an thlak lai live-a tihchhuah a ni dawn tih a sawi a, "Webcasting hi NIELIT zirlaite leh NIC lamin an buaipui ang," a ti.

Aizawl DC chuan, Aizawl district-ah chuan vote chhiarna hmun pangaah siam a ni dawn thu a sawi a; chu'ngte chu Pachhunga University College, Govt. Aizawl College, Hrangbana College, Assembly Annexe building leh R Dengthuama Hall-te a ni.

Dr A Muthamma chuan, vote nei rual, electoral roll-a la chuang lote chu an awmna bialtu BLO hnenah emaw, Aizawl DC pisaah emaw inhriattir turin a ngen a, "Vote nei rual tawh zawng zawng chu electoral roll-ah thun vek kan duh a, vote nei zawng zawngin vote thlak vek se kan duh a ni," a ti a; vote thlak dawnah voter-te hnenah an tana awlsamna turin voter slip pek a nih dawn thu a sawi.

Aizawl DEO sawi danin, Aizawl district-ah Assembly constituency 14 awmin, poling station 328 a awm a, chu'ngah chuan returning officer pasarih leh assistant returning officer 14 an awm. Rualbanlote leh mitdelte'n awlsam zawka vote an thlak theih nan EVM-ah brail hman a ni dawn a, mitdelte chuan anmahni puitu tur mi pakhat an hruai thei dawn. PS tinah mipui mamawh zualpui - inthiarna, tui in tur leh thil dangte siam/chhawp a ni ang. Postal ballot hmanga vote thlakna felfai zawk a awm theih nan electronic postal ballot hman a ni dawn.

Aizawl DC chuan, inthlan puan a nih hnuah flying squad-in hna an thawk ṭan nghal tih a sawi a, "Call centre kan siam a, call centre no. 1950-ah complaint thehluh theih a ni," a ti a; hmun hrang hranga sorkar hmalakna tarlanna poster-te hlih mek a nih thu a sawi rualin, political party tinte chu Model Code of Conduct bawhchhe lo turin a ngen a ni.

Aizawla vote chhiarna tur
PUC-ah: Aizawl North-I, Aizawl West-I,
Aizawl South-I, Ṭawi, Chalfilh & Tuivawl
GAC-ah: Aizawl South-II & Aizawl South-III
HBC-ah: Aizawl East-I & Aizawl East-II
Assembly Annexe: Aizawl West-II & Aizawl West-III
R Dengṭhuama Hall: Aizawl North-II & Aizawl North-III