Ramria Mizoram dinna kan CM-in Central & Assam a hrilh ngam lo - MPCC

Mizoram Pradesh Congress Committee (MPCC) chuan thuchhuah siamin, ramri chungchanga Mizoram sorkar dinna dik tak, Inner Line Forest Reserve 1875 chungchang chu chief minister Zoramthanga'n Prime Minister, Union Home Minister leh Assam Chief Minister-te a la hrilh ngam lo tih an tarlang.

MPCC chuan, hun rei tak Assam BJP sorkar hriatpuia Lailapur-a Mizoram châk lâkna kawngpui dan a nih hnuah November 11, 2020 zan aṭangin kawngpui hawn a ni tih tarlangin, "Mipui nunphung a pangngai leh ta hi a lawmawm. Kawngpui dan a nih avanga Mizoram mipuiin harsatna hrang hrang kan tawh mek laia Mizoram mipui, a bikin ramri hrúla chêngte huaisenna leh nu hoin huaisen taka hma an lakna avanga kawngpui dan tihtawp a ni ta hi lawmawm kan ti hle a ni," an ti.

Tun hnaia ramria buainaah NEDA-a MNF thawhpui Assam BJP sorkar chu a bul ṭantu an nih zel thu sawiin MPCC chuan, "October 28 aṭanga Lailapur-a Mizoram châk lâkna kawngpui an danah Assam BJP sorkar hi thûk takin a inrawlh ngei a ni. October 30 zanah Mizoram House, Silchar-a Mizo driver tangkhangte relhrûksantute pawh Assam police-te an ni," an ti a; November 11 zana lirthei kaltir theihna chhan Barak News-in a ziah dan chuan Assam CM-in na taka a nawr vang a nih thu an tarlang.

Congress party chuan, Assam-a BJP sorkar chu tun hnai buainaah a bul tumtu an ni tih a chiang chungin, MNF sorkar thuneitute'n Assam sorkar demna ṭawngkam an nei lo nia sawiin, "A tìr aṭanga a tàwp thlengin Mizoram CM phei chu a ngawi tluan. Prime Minister, Union Home Minister leh Assam CM hnenah kawngpui dan vanga Mizo mipui harsatna leh ramria Mizoram sorkar dinna pawh tun thlengin sawifiahna a la nei lo," an ti.

MPCC tarlan danin, secretary leh DC level-a inbiaknaah Mizoram sorkar official-te an chêt ṭhat tâwk loh chuan 'CM-in a hriatpui lo' tiin MNF-in dâwtin Zoramthanga thlavâng an hauh ṭhin. MNF MLA 12-te’n Lalduhoma an hêkna pawh 'CM-in a hriatpui lo' tiin, dâwtin Mizoram mipui an báwl kual tawh a ni.

Ramria buaina a awm laia Home Minister reh lutuk chu ngaihṭhat thlak loa an hriat thu sawiin MPCC chuan, "Ramri depa chengte  thlamuan tura pên khat pawh a pên lo hi Mizo mipui tan a beidawnthlak tak zet. Minister atana lak luh a nih ṭuma a incheina Mizo mipuiin kan mitthlaa kan la hmuh laia ramri depa harsatna kan tawh laia a bibo daih hi Mizo mipui tan hriatthiam a har hle dawn a ni," an ti.