Zoramthanga'n inthlan dan bawhchhiate MNF hmunpuia hriattir turin a chah

MNF president Zo­ramthanga chuan, Mizoram inthlanpui hun puan a nih tawh avangin contract leh supply hna inpek leh NLUP sem a theih tawh loh tih a sawi a, dan bawhchhia hriate chu MNF Gen.Hqrs.-ah hriattir turin a chah.

Nimina Mizo Hnam Runa imkhawmah Zoramthanga chuan, inthlan puan a ni tawh tih sawiin, "Contract/supply leh hna inpek khap vek a ni a, sorkar hmalakna kal lai pawh ni se, 'Beneficiaries oriented' ang chi reng reng NLUP sem thlenga khap a ni tawh. Heng lo tiru hria, unit, group leh block-te chuan MNF Gen.Hqrs.-ah rawn thlen ula, Election Commission-ah an thlen zel ang," a ti a; Conduct Rules kalha chete an thlithlai reng dawn thu a sawi.

Zoramthanga chuan, MNF sorkarin kum 2008-a district thar pathum an puante chu Congress sorkarin kum 10 chhungin an tihlawhtling duh lo tih sawiin, pawi an tih thu a sawi a, "Pathian leh mipui zarah MNF hian sorkarna a chang leh ngei turah kan beisei a, heng district pathumte hi a takin function tir vek kan tum," a ti.

MNF President chuan, Congress sorkar term hnih chhunga an hmachhawp pawimawh leh thil ṭha an tih an hriatte chu MNF a sorkar chuan chhunzawma tihpuitlin vek an tum thu sawiin, "Sinlung Hills Council siam thuah te, Sialkal Range Development Council an siam te, Union Home Ministry nen Bru chungchanga hma an lo lakte leh thil dang pawimawh, Zoram tana ṭangkai leh ṭhate chu tihhlawhtlin vek kan tum dawn," tiin a sawi.

Zoramthanga chuan, an khingpuite'n MNF a sorkar ngei dawna an hriat avangin kawng hrang hrangin MNF beihna an zawng nia sawiin, tun hmaa ACB-in case an siamsak duh tawh lote chu chhui turin hma an la nawn leh tih a sawi a, "Kei ngei pawh ka sawi loh pui pui min sawitir lui a, tu party president pawh ni se, an ṭawngkam aṭanga chhuaka mawi lo hi min sawitir ṭhin. Hengte hian kan sorkar turzia a entir a ni," a ti.