Ram hmasawnna atan Congress candidate vote a ṭul - Lal Thanhawla

Congress party presi­dent Lal Thanhawla chuan nimin khan Congress Bha­van-ah thu a sawi a, "Ram hmasawnna turin Congress candidate-te vote a ṭul," a ti. Hetih lai hian, Chalfilh biala Congress unit hruaitute leh V/C-te chuan an bialtu MLA Dr Ngurdingliana an biala din tir leh tura ngenna MPCC President hnenah an thlen.

Lal Thanhawla chuan, candidate tihfel a nih hnuah mahni duhzawng lo candidate an awm theih thu sawiin, "Mizoramin malsawmna a dawn in duh chuan in duh emaw, duh lo emaw in biala Congress candidate vote a ngai ang. Lehlam hawi pah a, mittui tla chung pawha Congress candidate in vote chuan mite tan malsawmna in ni dawn a ni," a ti a; Congress vote-tute chuan hmasawnna an vote chhuah dawn thu a sawi.

Inthlan hmachhawn turin political party zawng zawng an inbuatsaih thu sawiin MPCC President chuan, "Mipuite'n an ngaihtuah atana ka duh chu, chhuan lokal zelte tana hmasawnna thlentu an ni nge, hmasawnna tiṭhuanawptu an ni tih hi a ni," a ti.

Lal Thanhawla chuan, MLA inthlanah ṭum khatmah a duhnaah a la din loh thu sawiin, "Serchhipah ṭum sarih ka ding tawh. Vaiw hnih khat tlin hnua bial mipuite'n an nin an awm hi mak ka ti. Bial mipuite'n min nin chhanah sum a tel tawh chuan a buaithlak tawh ṭhin," a ti a; mahni tum tuma candidate nih lo tum ve ngawt tur a nih loh thu a sawi.

MPCC President hian DIG aṭanga pension LT Hrang­chal, IPS (Rtd.) chu an party-ah a lawm lut a; LT Hrangchal chuan, poli­tical demand neiin Hmar hnamte chu silai chelekin an rammut tawh ṭhin thu sawiin, "Ka hna avangin chu'ng mite ûmtu zingah chuan ka tel ve ṭhin," a ti.

LT Hrangchal chuan, HPC(D) leh Mizoram sorkar an inrem hnuah, inremna bawhzuina atan MLA neih ve Hmar mipuite'n duhin, amah chu an hmatheh ṭhin niin a sawi a, "Ka pension hnuah political party hrang hrang min sâwmtu an awm ve ṭhin a, mahse, hahchawlh ka duh rih thu ka ṭhin," a ti a; Hmar mipuite'n MLA atana an hmatheh lai takin Congress-in an party-a lut tura an sawm avangin a luh thu a sawi.

Hetih lai hian, Chalfilh constituency huam chhunga Congress unit leh village council hrang hrangte chuan LT Hrangchal hi an bialah a ding dawn nia an ngaih avangin Pathianni zan leh nimin khan an bialtu MLA ni lai Dr Ngurdingliana inah an kal khawm a, Dr Ngurdingliana lo chu MLA atana an duh loh thu an sawi.

Chalfilha Congress unit leh V/C hrang hrangte hian Dr Ngurdingliana'n an bialah hmachhawp a la neih avangin amah ngei an party-in candidate leh se an duh thu MPCC president Lal Thanhawla hnenah an thlen a, MPCC Nomination Committee member dangte an thil duh hi an sawipui bawk. Chalfilha Congress hruaitute chuan an duh ang tihhlawhtlin a nih loh chuan seal thehluh an hreh lo nia thudawn a ni.