District-a puan tawhte function theih nan Budget-ah sum kan dah ang - Lalduhoma

Zoram Peoples' Movement (ZPM) chief ministerial candidate Lalduhoma chuan, sorkarna an chan chuan kum 10 kal taa sorkarin district-a a puan tawhte chu a function theihna atan budget-ah sum an dah tur thu a sawi.

Lalduhoma hian nimin khan Saitual Auditorium leh Keifang kâwnah thu a sawi a; "Mipui hian district kan táwngpaw demand lo. Kan hruaitute'n district min pek an tiam ṭhin avangin mipuite'n a hlawhtlinna atan kan nawr a, an thutiamah an din loh avangin harsatna a lo thleng ṭhin zawk a ni.

Hnahthial, Khawzawl leh Saitualte district headquarters puanna notification a tihchhuah order sûtna emaw a la awm loh avangin kan function tir ang," a ti.

ZPM CM Candidate chuan, sorkar kan hrawn mekin sorkar kum kal mek atan budget a pass tawh thu sawiin, "Heng district pathumte function tur hian financial year kal mekah hian budget-ah pawisa dah a nih miau loh avangin tihdanglam theih a ni lo," a ti a; Pathian leh mipui zarah ZPM-in sorkarna an chang a nih chuan Saitual District Demand Committee hnena hming sign-a a lo tiam tawh angin, district function turin 2019-20 budget-ah sum an dah tur thu a sawi.

ZPM-in a duh ber chu Zoram politics-ah Pathian ram thlen a nih thu sawiin Lalduhoma chuan, "Inthawina aiin rorelna fel ka duh zawk titu kan Pathian ṭihna nei miah loa rorelna fel lo vanga kan ram leh hnam tlakchhiat tawh dan en hian, mipuite kan harh chhuah a hun tawh. Kan awmna hmun kan sawn vanga kan au leh duh dan danglam ṭhin hi a pawi tak zet a ni," a ti a; mahni awmna a ṭha lo tih hriat reng hnua insawn ngam lo chu mi dawihzep an nih thu a sawi.

ZPM CM Candidate chuan, prin­ciple nei lo hruaitu Mizoramin a neih ṭhin avangin Mizo mipuiin an tawrh nasat thu sawiin, "He bial pawh hi duh aiin a bialtu che u hian a hmangaih tlai hret che u a ni. Hetianga a báng ngam a nih chuan budget session-ah a function theih nan dah a nih loh rual khan nawr ngam se, vawiinah chuan district puitling kan lawm daih tawh ang,” a ti.

ZPM aṭanga Ṭawi bial viltu R Lalṭhatluanga pawhin thu sawiin, "Kan ram politics thli chhiain kum 32 chuang min nuai tawh a, mipuite'n kan duh zawng leh ṭha pawh sawi ṭha ngam tawh loin min siam a, 'Right to freedom of speech' an palzût a ni," a ti a; ZPM an sorkar chuan sorkar hnathawkte pawh an ngaihdan sawi ngam turin zalenna an pek tur thu a sawi.