Hnam Chhantu-in Autumn Fair buatsaih

Hnam Chhantu Pawl chuan nimin aṭang khan Vanapa Hall-ah October 12 thleng awh tur Autumn Fair an buatsaih a, Vanglaini jt. editor Lalnghinglova Hmar-in a hawng.

Autumn Fair hawngtu Lalnghinglova Hmar chuan hnam fing apiangin mahni siam chhuah thil an ngaisang ṭhin tih sawiin, "Mizo zingah pawh tun hnaiah Mizo kut chhuak ngei ngaihsan nachang hria an pung a, mipui nawlpui pawhin Mizo kutchhuak kan ngai hlu tawh a ni," a ti.

Hnam Chhantu Pawl president Ramhmangaiha sawi danin, an pawl hian kumtin October-ah an thil siam pho chhuahna hun an buatsaih ṭhin a ni. Kumin hian an pawl chauh ni loin, midang 18 an tel a, Bamboo Development Agency-in an sponsored a ni.

Autumn Fair-ah hian kut them thiam thil hrang hrang, ei tur, furniture, tarmawi leh hunmawi, thawmhnaw, in chhung mamawh chi hrang hrang, pangpar leh thil dangte pho chhuah a ni.