Ram hmasawnna atan chuan Huaisen taka thawh a ni ang - K Sapdanga

Zoram Peoples Movement (ZPM) leader K Sapdanga chuan nimin khan an party pisaah thu a sawi a, "Ram hmasawnna atan chuan huaisen taka thawh a ni ang," a ti.

K Sapdanga chuan, ZPM-in sorkarna an chang a nih chuan inthlan leha tlak hlauh vanga tih ṭul tih ngam loh te, tih hauh loh atana ṭha tih luih ṭâlh ang chi a awm dawn loh thu sawiin, "Ram hmasawnna atana ṭha chu huaisen taka thawh a ni dawn a, sut ngai apiang kan su ngam ngei ang tih kan hotupa hmel aṭang hian a lang a ni," a ti a; sorkar an din tur chu Mizoram sorkar a nih tur thu a sawi.

Sorkar an chan kum khatna aṭangin kut hnathawktute din chhuahna leh hmasawnna ngêlnghet, kawlphetha leh kawngpui an bitum tur thu sawiin K Sapdanga chuan, "Sorkarin ṭhalaite hnenah 'Puih theihna che u ka nei em?' tiin a zawt ang a, rin ngam chhânna pe thei apiangte tan sorkar chu belh tlak 'Sûtpui' atan a ṭang dawn a ni," a ti.

ZMP sorkar chu thawk peih apiangte dinchhuahna sorkar a nih tur thu sawiin Sapdanga chuan, "Ruling LC Chairman/VC President nih aiin sawh­thing huan ṭín khat hmun neih a hlawk zawk dawn a, furniture workshop pawh dinchhuahpui a awlsam zawk ang," a ti a; sorkar hmasain hna an ṭan tawh, ram tana ṭhate chu an chhunzawm tur thu a sawi.

K Sapdanga chuan, kumin MLA inthlan lo awm turah boruak danglam tak a thlen mek thu sawiin, "Kan khingpui pawlte hi pawl upa tak an ni a, an policy erawh nikum lawka an duan NEDP leh SEDP-te a ni. Keini chuan hmanni lawkah kum khat tlinna kan lawm chauh a, kan policy-te erawh kum 40 kal taa Pu Brig. T Sailo lo siam tawh, Six Basic Needs leh kum 25 kal taa Pu Lalduhoma lo siam tawh thlaithar policy-te a ni," a ti.