Hmun hrang hrangah RTI Week hmang

Nimin khan Mizoram hmun hrang hrangah Right to Information (RTI) Week hawn a ni a, Champhaiah chuan Govt. Champhai College-ah chief infor­mation commissioner (CIC) Lalduhthlana Ralte-in a hmanpui.

Lalduhthlana Ralte chuan RTI chu lang­tlang sorkar siam nan leh sor­kar khalh ngilna dan anih thu sawiin, "Mipui sor­karna leh zalenna ramah mipuite an chanvo leh dikna, sorkara an thil hriat duhte fiahfai taka hriattir anih theihna turin RTI hi duan a ni. India ram bakah Mizoram ngeiah pawh RTI hi ṭangkai taka hman chhoh mek a ni a, ṭangkai leh zuala hman chhunzawm zel anih theihna atan ṭan lak zel a ni," a ti.

RTI Week hmanaah hian chawhnu lamah RTI Act zirhona buatsaih a ni a, department hotute, college zirlaite leh tlawm­ngai pawl hruaitute an tel.

Kolasibah chuan RTI Week hi Parish Hall-ah hman a ni a, an hun hmanpuitu information commissioner Zorammawia chuan RTI-in a tum ber chu langtlang sorkar siam a nih thu sawiin, "Chumi ti hlawhtling tur chuan India Parliament in kum 2005 khan RTI dan hi a zam a, he dan hmang hian sorkarhmalakna hrang hrangte a zirchian theih a, chumi ti hlawhtling tur chuan mipuiten RTI dan hi kan chhawr ṭangkai a ngai a ni," a ti.

RTI Week hmanna ah hian RTI chungchanga hriat tur pawimawh hrang hrang, RTI kal tlanga zawhna zawh dan, RTI in a huam loh / RTI kal tlang­a chhan theih lohte mipui kal­khawmte hrilhfiah an ni.

Siaha-ah chuan RTI Week hi IPR conference hall-ah hman a ni a, khuallian DRDA project director T Malsawmsanga chuan Mizoramah pawh mipuite hian RTI Act hi kan hmelhriat chho ve tawh hle tih sawiin, "RTI Act avanga information kan mamawh tak tak te kan dawn phah fo tawh hi thil lawmawm tak a ni," a ti.