Serlui Bialtu MLA-in ramri a tlawh

Serlui bialtu MLA Lal­rinsanga Ralte chuan November 14, Inrinni khan a bial chhunga Mizo­ram-Assam ramrîte a tlawh a, sorkar hmalakna enpuiin, khawtlang hruai­tute nen an inkâwm.

Lalrinsanga Ralte chuan, Saihapui-V a tlawhnaah khawtlang mipuite chu ram leh hnam tana an inpekna leh an huaisennaah a fak a, "Tun hnaia Assam police leh civil mi ṭhahnem takin an rawn rîkrâp che u avanga buaina nasa tak in tâwk hi pawi ka ti hle. Mizoram humhalh tura in inpekna leh inhuamna ka chhuang tak zet a ni," a ti.

CM Zoramthanga kaihhruai sorkarin ramri depa awm khuate hma­sawn nan theihtawp chhuahin hma a la mek nia sawiin Lalrinsanga chuan, "Saihapui-V panna kawng hi tun ṭhál lai ngeiin siam a ni dawn," a ti a; agriculture lamah pawh Saihapui V-ah nasa taka hmalak a nih dawn thu a sawi.

Serlui Bialtu MLA hian Saihapui-V mipuite thlahualna atan vawk a talh a, Covid-19 vanga ruaiṭheh a rem loh avangin vawksa chu in tinah sem a ni.

Lalrinsanga Ralte hian Buarchep leh Phainuam tlawhin, khawtlang hruai­tute nen an inkâwm a, Buar­chep phai leilet pan­na kawng chu lirthei lut thei turin laih a tum thu a sawi. Phainuam nu hoin hnam hnatlang neia kawng zawha huaisen taka hma an lak avanga lawmthu sawi nan Phainuam MHIP chu Rs. 5,000 a pe.

Vairengte khawtlang hruaitute nen an inkawm­naah Lalrinsanga chuan, "Vairengte mipuiin IR duty post an sak chu Mizoram sorkarin chhuahsan a tum lo a, remchanga chei zel tum a ni. Ram humhalh nana Vairengte mipui huaisenna leh inpekna a fakawm tak zet," a ti a; hun lo kal zel turah pawh ramri chungchangah lungrual taka sorkar hma lakpuiah a sáwm a ni.