Kan sorkar chuan Mizoram hi hlemhlete Inkiltawihna ram a ni ang - Lalduhoma

Zoram Peoples Movement (ZPM) chuan nimin khan Sihphir Community Hall-ah Aizawl East-I Workers' Meet leh 'Kalphung thar zirna' an buatsaih a; ZPM chief minis­terial candidate Lalduhoma chuan, sorkarna an chan chuan Mizoram chu mi hlemhlête inkiltawihna ram a nih tur thu a sawi.

Inkhawm hi Aizawl East-I ZPM North Block chairman Lalnelawma'n a kaihruai a; Lalduhoma chuan, a taka Pathian ṭih mite kaihhruai sorkar siam turin Mizo mipui a sáwm a, "Sorkarna kan chang a nih chuan Mizoram hi 'Kalphung thar, mipui sorkar' a thawkrim apiangte dinchhuahna ram, mi hlemhlete inkiltawihna ramah kan siam ang," a ti.

ZPM CM Candidate chuan, Saitual MNF Block leh Thingsul MNF Block-te'n ziak meuhin an biala ding tura R Lalzirliana an duh loh thu an lantir thu sawiin, "MNF hi bial tam takah an in set hlum mek a, bial lo vil mektute hnâwlin candidate tur mi dang an dah hi an chhiatpui mek a, an luahlante leh anmahni ṭantute rilru náin an siam a ni," a ti a; MNF-in mi thar an lawm luh apiangin ZPM-in a hlâwkna an têl niin a sawi.

MNF-a lungawi lote sengkhawm hna an thawh dawn thu sawiin Lalduhoma chuan, "Party dang pahnih nena an inkawp pawha MLA panga chauh nei thei MNF hi kum 2018 MLA inthlanah an mal ṭan dawn a, an MLA pangate vote tlingtute kha ZPM-ah an tel vek tawh a ni," a ti.

ZPM CM Candidate chuan, Aizawl East-I biala MNF candidate tur chu a neih phû loa hausa a nih thu sawiin, "Anticipatory bail ak chunga campaign mek hi Mizoram sum enkawl turin rin a hlawh tawh lo," a ti a; Aizawl East-I mipuite chuan vote tur dik tak hria se a duh thu a sawi.

ZPM aṭanga Aizawl East-I viltu K Sapdanga, ZPM leader pawhin thu sawiin, Aizawl East-I bial chu hun rei tak ruling party MLA bial a nih thu a sawi a, "Aizawl hming pú constituency-ah chuan rethei tamna ber kan ni. Taima ber bial, hna thawk nasa ber bial kan ni thung," a ti.

K Sapdanga chuan, Aizawl East-I chuan kawngpui ṭhain a tlawhpawh loh khua leh veng tam tak an la neih thu sawiin, "ZPM hian Pathian leh mipui zarah sorkarna kan chan chuan kawngpui ṭha neiin, tui thianghlim hnianghnar kan nei ang. Bial hmasawn ber leh changkang ber bialah kan siam dawn a ni," a ti a; bial mipuite an inhuam a nih chuan hma a hruai zel tur thu a sawi.

ZPM star campaigner Vanneihtluanga pawhin thu sawiin, "YMA CEC leh CCC lo pianna chhan leh a sûlsutu chu K Sapdanga hi a ni. Mizoram journalist pawl zahawm taka siamtu hi Sapdanga hi a ni ka ti lo thei lo. Mizorama party lian pahnihte hi, an pute hian in withdraw hun an hriat loh vangin kan buai a nih hi. Mizoramah hian nupuiin a zir lo, a fate'n an zir lo, an chhungkuain a tlin lo tih ngai khawp politician hi kan va ngah tawh em," a ti.