Jeremy-a'n Youth Olympic-ah Gold medal a la

Jeremy Lalrinnunga (17) s/o Lalneihtluanga, Govt. Complex, Aizawl chuan 3rd. Youth Olympic Games 2018, Buenos Aires, Argentina-a neih meka nimin zing khan rit inchawisiak (weight­lifting) kg. 62 category-ah gold medal a chawi chhuak.

Jeremy-a hian snatch-ah kg. 124 leh clean & jerk-ah kg. 150 chawiin, a chawi belhkhawm chu kg. 274 a ni a; Youth Olympic Games-a India tana gold medal dawng hmasa ber a ni.

Jeremy Lalrinnunga hlawhtlinna hi a lawm­pui thu Sports & Youth Services minister Zo­dintluanga chuan thuchhuah siamin, a tarlang a, "Mizo ṭha­laite India ram mai ni lo, khawvelah an lan theih nan naupan lai aṭanga bul tana inzirtir a pawimawh tih hriain Mizoram sorkar, Pu Lal Thanhawla kaihhruaiin Catch Them Young policy a duang chhuak a, Jeremy Lalrinnunga pawh hi a tel ve a, amah hmanga Catch Them Young hlawhtlinna ropui tak lo lang chhuak ta hi a lawmawmin a ropui tak zet a ni," a ti a; Mizo ṭhalai dangte pawhin Catch Them Young an hlawhtlingpui zel a beisei thu a sawi.

Zodintluanga chuan, Jeremy Lalrinnunga a lawmpui thu leh a chhuan thu a sawi rualin, a nu leh pa te, weightlifting association hruaitute leh training petu zawng zawng chungah lawmthu a sawi a, "A kal leh zelna turah hlawhtlinna sang zawk chang zel tur leh, Olympic-ah pawh India tan medal la zel turin duhsakna sang ber ka hlan e," a ti.