Lungleiah sum chingpen a tamah ngai; Lunglei MNF-in ACB-ah FIR an thehlut

MNF sub-headquar­ters, Lunglei vice presi­dent leh an Vigilance Committee chairman F Lalsawmkima chuan, Lunglei District High Powered Committee (HPC) bakah, NHDP leh NERTPS-ahte sum tihchingpen tam tak a awm niin a sawi. Sum tihchingpen a awm nia an hriatte chu chhui chhuah a nih theih nan nimin khan Anti Corruption Bureau (ACB)-ah FIR an thehlut.

Lunglei MNF hruai­tute chuan nimin khan Aizawl Press Club-ah thuthar thehdarhtute an kâwm a; F Lalsawmkima chuan, Lunglei HPC work schedule-ah Ṭhuampui-Vuakmual link road siam nen kum 2013-14 ah Rs. 8,00,000 dah a ni a, NLUP hnuaiah kum 2014-15 chhungin Rs. 15,00,000 dah a ni bawk tih an sawi a, "Ṭhuampui-Vuakmual hi kum 1999-2003 inkarah BADP sum hmanga laih zawh vek tawh a ni," a ti.

RTI Act hmanga information an hmuh danin, Lunglei district-a hna thawhna tur sum cheng nuai 100 tél a bo nia sawiin Lalsawmkima chuan, "ACB-ah FIR kan thehlut a. ACB Dy. SP leh a hote'n rawn chhuiin thla khat chhungte an rawn chàm chilh ṭhin. Report pawh ACB-ah an thehluhna a rei tawh a, mahse, hmalak chhunzawmna a awm lo," a ti a; Congress sorkarin police-te an hnungkhirh niin a sawi.

Lunglei MNF Vigilance Committee tarlan danin, National Handloom Development Programme (NHDP)-a cluster pasarih zinga Lunglei cluster hnuaiah Zobawk Handloom & Handicraft Cooperative Society Ltd. chu din niin, May 9, 2016-ah ruai nen hawn a ni a; hawn a nih lai hian registration an la nei lo a, an registration no. & date chu L-628/2016-2017 Dt.7.9.2016 a ni. Chutih laiin, Zobawk HHCS chuan sorkar laipui aṭangin November 24, 2015-ah kum 2015-16 atan pawisa an hmu a ni.

Zobawk HLHC-ah beneficiary 40 an awm a, chu'ng mite hnena sum sumnaah, sum sem tura ngaih zinga Rs. 25,25,350 chu sem a ni lo a, a awmna chin hriat a ni lo. Hei hi sawifiah turin Commerce & Industries minister H Rohluna leh parliamentary secretary ṭhin Joseph Lalhimpuia te an phût.

Lunglei MNF hotute dawi dan­in, North Eastern Region Textile Promotion Scheme (NERTPS) hnuaiah Mizorama khaw 17-ah puantah lama ṭanpuina dawngtu mi 1,216 an awm a, chu'ng zinga 769 chu autonomous district council (ADC) páwn lama mi an ni. ADC páwn lama mite hnenah workshed sakna tur Rs. 26,000 ṭheuh leh FS loomframe leh set off accesories pek tur a ni.

Chutih laiin, beneficiary pawisa dawn tur zinga Rs. 73,05,500 chu MNF chuan a boah an ngai a; NHDP hnuaia sum bo nen, scheme pahnih hnuaiah hian a vaiin Rs. 1,02,69,500 a boah an ngai a ni. Lunglei MNF-te chuan, NERTPS hnuaia beneficiary 769 (ADC tel loin)-te thla li chhung an training lawmman (stipend) Rs. 18,45,600 chu chhuak thuai turin sorkar an phût bawk.