Vawiinah CADC ṭhiah phûtna kawngzawh

Central YMA bultumin vawiin hian Aizawl leh district khawpui hrang hrang bakah, khaw dang ṭhenkhatahte Chakma Autonomous District Council (CADC) ṭhiah duhzia lantir nan kawngzawh a ni dawn. Kawngzawhah hian YMA member zawng zawng tel turin Central YMA chuan a ngen.

CYMA-in ruahmanna a siam dan chuan, Aizawlah chuan hmun hnih - Sikulpuikawn leh Chanmari kâwn aṭangin kawng zawh ṭan a ni ang a, Vanapa Hall-ah intawh khawm tur a ni. Aizawl khawpui chhim lama awm YMA branch-te chu Sikulpuikawn

aṭanga kal tur niin, hmar lam branch-te chu Chanmari kawn aṭanga kal tur a ni.

Central YMA chuan CADC ṭhiah phûtna kawngzawh hi district khawpui tin bakah, YMA group leh branch-te chu an huam chhungah a remchan dan anga kawngzawh huaihawt turin an ngen a; he thu ziah lai thleng hi chuan YMA sub-headquarters zingah kawngzawh huaihawt thei lo tur an awm lo.

CYMA hruaitute chuan, RTI Act hmanga zawhna chhannaah, CADC chu dan dik lo hmanga din a nih thu hriat a ni a, Indian Constitution kalha din nih bakah, din a nih dáwnah Mizorama roreltute ràwn an ni lo tih thu an dawn thu an tarlang.

Kawngzawh hi ṭha an tih thu leh an thlâwp thu tarlangin MZP chuan, kawngzawhah Mizo zirlai a tam thei ang ber kal turin an ngen a, "CYMA-in CADC ṭhiah chungchanga hmalakna reng rengah MZP chuan a tawp thlengin a thláwp zel dawn a ni," an ti.