Hmun hrang hrangah Faina Hapta khâr a ni

Mizoramah October 2, 2018 aṭangin Faina Hapta (Cleanliness Week) hman a ni a, nimin khan Mizorama district khawpui leh khaw dang ṭhenkhatah a khârna inkhawm hman niin, faina lama inelna lawmmante sem a ni.

Lungleiah chuan Convention Centre-ah Faina Hapta khârna inkhawm neih a ni a, district bawrhsap Dr Ankita Chakravarty khuallian niin, faina kawnga inelna hrang hranga lawmmante a sem.

Lungleia veng fai ber chu Sethlun a ni a; office fai ber Cooperative Society Assistant Registrar pisa, sikul zingah elementary school (below 50 enrollment)-ah Zotlang P/S-1, elementary school (above 50 enrollment)-ah Pukpui P/S-I leh secondary school-ah Pukpui High School-te pakhatna an ni bawk.

Siaha-ah chuan DRDA Conference Hall-ah Faina Hapta khârna inkhawm neih a ni a, DRDA project director T Vanlalmalsawmsanga khuallian a ni. Siaha khawpuia veng zingah Council Vaih a fai ber a, College Vaih-I leh Meisavaih East ten an dawt. Restaurant-ah South Gate, hotel-ah Eros Hotel, office-ah District Research Officer (DRO)-te an fai ber.

Sikul fai ber chu Mesavaih 'E' P/S-I a ni a, faina lam hawi thu chhuah ṭha ber chanchinbu chu Siaha Post a ni. Essay leh painting competition-a lawmmante sem a ni bawk.

Faina Hapta hi Champhaiah chuan IPR Auditorium-ah kharna inkhawm neih a ni a, additional DC K Vanlalṭhiana khuallian niin, lawmmante a sem. Champhai khawpuiah Hmunhmelṭha chu veng fai bera thlan a ni a, Tlangsam leh Champhai Venglai ten an dawt. Office fai ber chu Champhai District Court a ni a, PHE EE Office pahnihna niin, SDEO pathumna a ni.

High school leh higher secondary school-ah Pine Hill H/S a fai ber a, middle school-ah Vengthlang M/S leh primary school-ah Champhai P/S-VI pakhatna an ni. Anganwadi-ah Venglai-II leh Zotlang-IV pakhatna an ni a; restaurant-ah Sawmtei Restaurant, Venglai pakhatna a ni. Faina Hapta puala M/S on the Spot Painting Competition-ah Lalrinnungi, BC Lalthlamuana English Academy chu pakhatna a ni a; H/S & HSS on the Spot Essay Writting Competition-ah John Vanlalremruata, Champhai H/S pakhatna a ni bawk.

Faina Hapta hi Lawngtlaiah chuan DC conference hall-ah khâr a ni a, bawrhsap N Chakhai khuallian a ni. Lawngtlaia sikul fai ber chu New Model English School a ni a, Rev. Thanzinga Memorial School leh Don Bosco School ten an dawt. Sorkar office fai ber chu Land Resources, Soil & Water Conservation department pisa a ni. Lairam Hotel chu hotel fai ber a ni a, restaurant fai ber chu New Adalia Restaurant a ni.

Mamitah chuan Chhimveng YMA Hall-ah khârna inkhawm neih niin, SDO (Sadar) HD Lalpekmawia'n a kaihruai a, lawmman hrang hrang an sem. Chhimveng chu veng fai ber a ni a, Bazar Veng pahnihna niin, Venghlun pathumna a ni.

Sikul fai thlannaah primary-ah Luangpawl P/S-IV, middle school-ah Charkawn M/S-I, high school leh higher secondary-ah St.Francis of Assissi School-te pakhatna an ni a; hotel/restaurant fai ber chu BM Hotel a ni.

Khawzawlah pawh BNRGSK building-ah khâr a ni a; veng fai ber chu Zaingen Veng, sorkar pisa fai ber KVK Khawzawl, sikul fai ber Khawzawl HSS-te a ni. Zawlnuamah pawh khârna inkhawm neih niin, BDO Lalnunfela Chawngthu-in a hmanpui. Zawlnuamah hian Cleanliness Week khârna pualin faina thuziak kengin khawtlang mipuiin kawng an zawh a ni.