MBDPF-te'n chhawmdawlna pe zel turin Prime Minister leh Home Minister an ngen

Mizoram Bru Displaced Peoples' Forum (MBDPF) chuan nimin khan prime minister Narendra Modi leh Union Home minister Rajnath Singh hnenah lehkha an thawn a; Tripura-a relief camp hrang hranga awm Bru-te tan chhawmdawlna pe chhunzawm turin an ngen.

MBDPF chuan, Ministry of Home Affairs, Mizoram sorkar leh Tripura sorkar ten New Delhi-a July 3, 2018-a inremna an ziah chu a hlawhtlin theihna atan theihtawp chhuahin, kawng hrang hrangin hma an la niin an tarlang a, "Chu bakah, hruai kîr hna tluang taka a kal theihna atan sorkar official-te theihtawpin kan ṭawiawm a ni. Mahse, mipui lamah agreement pawm lohna a nasa hle a ni," an ti.

Sorkar laipuiin Tripura relief camp-a Bru-te chhawmdawlna pek a titawp chu thil dik a ni lo nia tarlangin MBDPF chuan, "Thil hrang hrang chinfel tur tam tak a la awm a, agreement-a tarlan thil tihhlawhtling loh pawh tam tak a la awm a ni," an ti a; ni 9 chhung chhawmdawlna an dawn tawh loh avangin mipuite an mangan thu an tarlang.

Tarlan tawh angin, Tripura relief camp-a Bru-te hruai kîr hna thawh hun chhung tura ruahman chu September 30-ah a tawp a; chumi hnuah sorkar laipui chuan October 1, 2018 aṭangin chhawmdawlna pek a titawp a ni.