MLA inthlan tur atan inbuatsaih zel

November 28, 2018-a Mizoram Legislative Assembly inthlanpui awm tur atan district hrang hrangah inbuatsaihna ngawrh taka kalpui zel a ni.

Lungleiah chuan DC conference hall-ah district-a Flying Squad (FS) leh Video Surveilance Team tan Thawhṭanni leh nimin khan training buatsaih a ni a, DC Dr Ankita Charavarty-i'n a hmanpui. DC chuan, inthlan felfai leh muanawm tak a awm theih nan mawhphurhna nei zawng zawngte ṭha taka thawhho a ṭul tih sawiin, Election Commission of India (ECI) duh dante ṭha taka zawm a nih theihna atan tih tur leh tih loh tur hrang hrang training tura kalkhawmte a hrilh.

Election officer James Lalnithanga chuan, flying squad member-te chu an tih tur leh an hnathawh dan turte a hrilhfiah a; chumi hnuah flying squad-te hnathawhna atana mamawh tur hrang hrang an sawiho nghal a ni.

Champhai District Election Office pawhin nimin khan Flying Squad member leh Static Surveillance team-te pualin DC conference hall-ah training an buatsaih. Additional district election officer K Vanlal-ṭhiana'n Champhai district-ah inthlanna felfai leh dik tak a awm theihna atan kalkhawm­te chu thawhpuiah a sáwm.

Lawngtlaiah pawh Thawh­ṭanni khan an district chhunga Flying Squad-te tan DC conference hall-ah training buatsaih a ni a, DC N Chakhai-a'n a hmanpui. DC chuan, inthlan felfai leh muanawm tak a awm theihna atan mawhphurhna nei zawng zawngte ṭha taka an thawhho a ṭul thu sawiin, "Pawimawh bik emaw pawimawh lo deuh emaw an awm chuang lo. Tumah inthlahdah loin mahni mawhphurhna ṭheuh fel taka hlen chhuah tum tur a ni," a ti.

Flying squad hi inthlannaa suma intham leh inlei te, zu emaw, vote lei theihna tur thil dang emaw sem a awm loh nana hma latu tur leh a awm leh awm loh enfiahtu tur an ni.