KHAWTHLIR

Health minister Dr R Lalthangliana chuan thuchah siamin, kum 2020-2022 chhunga MJA Gen.Hqrs hruaitu atana puan tharte chu lawmpuina leh duhsakna a hlàn. Minister chuan, "Inthlahrung taka sorkarin Covid-19 No Tolerance a hman mek zah tak leh sorkar duh dan leh phalna la thlapa pawl hruaitu thar puanna inkhawm an buatsaih hi an fakawm hle a, páwl dangte tan entawn tlak niin ka hria," a ti.

46 Assam Rifles chuan November 14, Inrinni khan Hmangaihna In leh Grace Home-a naupangte hnenah Children's Day pualin ṭanpuina an hlan. Hmangaihna In leh Grace Home hi AR officer-te'n tlawhin, naupangte mamawh tur thil chi hrang hrang an pe a ni.

Khawzawl DC Zothanmawia chuan Khawzawl Tourist Lodge awmna lai báwr vel chu November 14, 2020 aṭangin containment area-ah a puang. Tourist Lodge hi tun hnaia phai aṭanga Khawzawla haw, quarantine lai mi 11, Covid-19 vei an ni tih hmuh chhuahte awmna a ni a, covid care centre atan hman a ni.

Evangelical Church of Maraland (ECM) KTP, Siaha New Colony Bial chuan November 14, Inrinni khan District Hospital tan thisen unit 67 an pe a, a petute mipa 58 leh hmeichhia pakua an ni.

Champhai district magistrate Maria CT Zuali chuan, November 14, 2020-a Mizoram sorkar thuchhuak angin, Champhai khawpuia in sak theihna chinah phaizáwl leilet hmun a telh loh thu leh, phaizáwl (paddy field) chu humhalh tlat a nih thu a puang. Phaizawl leilet huam chhunga pass pek, a nihna tur ni loa hmanga in leh kudam sa tawhte chu December 15, 2020 hmaa ṭhiat turin a hriattir bawk.

State Referral Hospital (ZMC)-ah Covid-19 vei mi 46 enkawl mek an ni a, an zinga pathum chu ICU-ah awmin, mi dang zawng chu Isolation ward-ah an awm. SRH-ZMC Bulletin tarlan danin, ICU-a awm mek zinga pahnih chu ventilator hmanga enkawl an ni a, pakhat dang pawh oxygen pek mek a ni. SRH-a awm mek zingah kum 60 chung lam mi 20 leh kum 14 hnuai lam pakhat an tel.