Mizoram High School Games ṭan a ni

36th. Mizoram Secondary School Games 2018 chu October 9, 2018 khan Thenzawl khuaa Loṭhazawla SAI Womens Hockey Training Ground-ah ṭan a ni a, School Education director K Laldingliana'n a hawng.

Hawnna inkhawm hi Serchhip district education officer Lawmawma'n a kaihruai a; K Laldingliana chuan, school games chu zirna tipuitling tura neih a ni tih sawiin, discipline ṭha leh tumruhna nghet nei a, taksa hrisel, rilru hrisel, lehkhathiam nih tum turin zirlaite a chah.

Thenzawla Mizoram School Games bikah hian hmei­chhe hockey leh hmei­chhe volleyball bikah inelna neih tur a ni a; volleyball-ah Aizawl, Lunglei, Champhai, Siaha, Kolasib, Mamit, Lawngtlai leh Serchhip district aṭangin zirlai infiammi an tel a, hockey-ah Aizawl, Lunglei, Siaha, Kolasib leh Serchhip district aṭangin zirlai an tel thung.

Mizoram Secondary School Games ṭum 35 neih tawhte chu Aizawlah vek neih a ni a, kum­inah erawh chuan Thenzawl leh Champhaiah nghah a ni dawn. Thenzawla hmeichhe hockey leh hmeichhe volleyball intihsiakna hi vawiinah zawh tum a ni a; October 23-26 chhungin discipline dangte chu Champhaiah neih leh a ni ang.