MZU Southern Campus a la fel lo Central kan ngaichâng - MZU Registrar

Lunglei Pûkpui ram chhung, Mausep rama Mizoram University (MZU) Southern Campus din tum chu tihfel theih a la ni lo. MZU registrar Prof. Lalnundanga chuan, MZU Southern Campus din chungchangah sorkar laipuia Ministry of Education thu an ngaihchàn mek thu a sawi.

Vanglaini palai zawhna chhangin MZU Registrar chuan, MZU Southern Campus a la fel thei lo tih a sawi a, "MZU lamin kan tih ve tur, kan tih ve ngai angte chu kan tifel vek tawh. Ministry lamin University Grant Commission (UGC) hnenah MZU Southern Campus din chungchang a zawt a, anni lam chuan a ṭha zawngin comment an pein kan hria," a ti.

Prof. Lalnundanga chuan, Ministry of Education-in UGC hnenah ṭum hnih zawhna a zawh lêt tawh thu sawiin, "Chungte chu UGC lamin min rawn dil angin kan thawn lêt. Final decision siamtu tur chu ministry lam an ni," a ti a; tun dinhmunah chuan final stage-ah a awm tawh nia an hriat thu a sawi.

MZU Registrar chuan, MZU Southern Campus chu a fel thuai theihna atan Mizoram sorkar pawhin Ministry of Education an nawr ve reng nia an hriat thu sawiin, "Tun hnaiah pawh Governor, Chief Minister leh Higher & Technical Education Minister-te pawhin Union Minister an bia ni àwmin kan hria," a ti.

MZU Southern Campus dinna tur ram chu tihfel vek a ni tawh thu sawiin Lalnundanga chuan, "Land lease pawh Mizoram sorkar aṭangin MZU-in a dawng tawh," a ti a; Ministry of Education-in phalna a pek hunah hna ṭan theih a nih tur thu a sawi.

February 27, 2020 khan Higher & Technical Education minister Dr R Lalthangliana chuan zawhna chhángin, MZU Southern Campus din phalna ministry aṭanga hmuh a nih veleh class ṭan vat a nih theih nan hmalak mek a nih thu Assembly House a hrilh a, "Campus hawnna tur hmun ngaihtuah mek a ni a, Pukpui VC area-ah hmun a awm thei tura beisei a ni. Kum 2020-21 session aṭangin zirna ṭan theih beisei a ni," a ti.

Dr R Lalthangliana sawi danin, MZU Southern Campus-a class ṭan lailâwkna atan Pûkpui rama Mizoram Engineering College building hman tum a ni a; mahse, tui, electricity leh a panna kawng siam a la ngaih bakah, faculty quarters turte a ngai dawn. Mamawh hrang hrang atana senso ngai zat tura chhût chu cheng vbc. 10 chuang a ni a, Chief Minister-in file-ah a ziak tawh.

January 29, 2020 khan CM Zoramthanga pawhin MSU-in Chanmari YMA Hall-a MZU Southern Campus din tur leh Bru-te Tripura-a an awm nghehna tur lawmna an buatsaihah MZU Southern Campus din an duh tâwk mai dawn loh thu leh western campus, eastern campus, khawi emaw laiahte pawh din belh zel an duh thu a sawi a ni.