CM Zorama leh Abu Mazumdar hi Inhnaivai tak an ni tih a hriat theih ; Abu Mazumdar hian Mizoram buhfai a supply - Zodintluanga

Congress Legislature Party (CLP) leader Zodin­tluanga Ralte chuan nimin khan Lungleia Congress Bhavan-ah thu sawiin, "Kan chief minister Pu Zoramthanga leh kuhva tawlhrua puh Abu Mazumdar, Assam hi inhnaivai tak an ni tih a hriat theih," a ti.

Zoramthanga leh Abu Mazumdar chaw an ei dun chungchangah sorkarin insawifiahna siamin, 'Chief Minister Zoramthanga sàwm a ni lo' tia an tarlan thu sawiin CLP Leader chuan, "Mipuiin ngaihdan an nei vek tawh. Eng ang pawhin insawifiah mah se, chaw an ei tlang tawh a, he sumdawng pa nen hian kan CM hi inhnaivai tak an ni tih a rin theih," a ti a, insawifiah ngai reng chu a buaithlak thu a sawi.

Zodintluanga Ralte chuan, Congress sorkar laiin Abu Mazumdar chuan Mizorama buhfai supply a dil thu sawiin, "Cong­ress kaihhruai sorkar khan pek tlakah a ngai lo," a ti a; MNF an sorkar hnuah Abu Mazum­dar chu buhfai supply tir a nih thu a sawi.

Insawifiah ngai reng sorkar leh chief minister hrawn reng mipuiin an ning tak zet tawh nia sawiin Zodintluanga chuan, "Sorkar nâwi tak kan hrawn hi mipuiin an ning tawh a, Congress party-ah beiseina sang tak an nei. Mipui beisei tihlawhtling tur hian kan chêt chhuah a ngai a, mipui beisei tihpuitlin hi kan bat a ni," a ti.

Thusawitu dang, Congress MLA Lalrindika Ralte chuan, "Dik taka thil tih hi kan ram hian a mamawh a, sum lak luh dan pawh a thianghlim tur a ni," a ti a, Pathiana innghat tlat turin an party mite a sáwm a ni.