Mualkhang LPG Bottling Plant tilian dawn

Chief minister Zoramthanga chuan, Mizoram sorkarin Mualkhanga LPG Bottling Plant siamṭhaa tilian turin hma a la dawn a, ni tin gas bur 7,000, truck 24 phur siam chhuah theih beisei a nih thu a tarlang.

CM Zoramthanga chuan Mualkhang Bottling Plant tihlen a nih tur thu hi nimin khan Instagram-ah a tarlang a; Mualkhanga LPG Bottling Plant (IOC LPG Bottling Plant) atan Mizoram sorkarin ram a pe tawh tih tarlangin, "Rei lo têah hmalak thuai beisei a ni," a ti.

"Mualkhanga IOCL LPG Bottling Plant tharthawh lehna turin ram zau tak, hectare 2-a zau chu tuna Bottling Plant ram hrûlah hian cheng nuai 47 man lei belh a ni a, Plant hmasaah gas bûr 2,500 (truck pariat phur) siam ṭhin niin, tuna siam thar leh siam len turah hian ni tin bûr 7,000 (truck phur 24) siam chhuah theih beisei a ni," tiin CM chuan a tarlang.

Chief Minister chuan, Bottling Plant atana hma latu FCSCA minister K Lalrinliana leh Land Revenue & Settlement minister Lalruatkima te fakawm a tih thu te, Mizoram mipui ni tin mamawh hnianghnâr taka lak luh leh tihpun kawngah Mizoram sorkarin theihtawp a chhuah zel dawn thute a tarlang bawk.

Tarlan tawh angin, Petroleum and Explosives Safety Organisation (PESO) endikna hnuhnung berin a phût ang thil ṭul ṭhenkhat siam belh a ngaih avangin Mualkhang Bottling Plant-ah hian hna chawlh lailawk a ni.

Oil Industry Safety Directorate Standard 169 zâwm tura duan a ni a, endiknaah Standard 169-in a phût ṭhenkhat - kâng ṭhelhna (automated fire hydrant) mumal tak siam te, Plant huam chhung felfai taka hung te, khawl lian bunna hrang hrangah lirthei luh leh chhuahna ṭha tak hmun hnih zela siamte leh, gas dah khawlna bûr lian (bullet tank)-in hmun ṭhenkhatah a chhah dan tur ang a phâk tawh loh avangin January 16, 2020 aṭang khan Mualkhang Bottling Plant-ah hian hna chawlh lailâwk a ni.