Mizorama grape chíngtute hnenah Zángnadawmna pek ngei kan phût - Lalduhoma
ZPM Legislature Party (ZLP) leader leh ZPM leader Lalduhoma chuan, The Mizoram Liquor Prohibition (MLP) Rules tur buaipuitu Sub-Committee thutlukna anga Mizoramah grape wine siam phal loh a nih dawn chuan, Mizorama grape chingtute hnenah zangnadawmna pein, eizawnna danga an pakài leh theihna khawp ruahmanna siamsak ngei an phût thu a sawi.
Lalduhoma hian nimin khan press statement siamin, grape chingtute leh grape wine siam chungchang a tarlang a; MLP Rules Sub-Committee-in grape wine siam phal loh tura thutlukna a siam chu Cabinet-in ennawn leh se an duh thu sawiin, "Sub-Committee thu hi an kaltlangpui dawn a nih pawhin, zangnadawmnate pein, eizawnna danga an pakai leh theihna khawp ruahmanna siamsak ngei se tih hi kan phût a ni," a ti.
ZPM Leader chuan, wine chu Food Safety and Standards Authority of India (FSSAI)-in food item-ah a dah thu sawiin, "Winery pawh food processing unit-ah a ngai. Liqour (zu) leh wine hi thil hrang a ni a, tehna thuhmuna teh chi a ni lo," a ti a; state hrang hrangah dan hnuaiah winery mumal taka kalpui a nih thu a tarlang.
Lalduhoma chuan, December 10, 2020-a chanchinbu pakhat chhuakah Excise Minister-in grape chíngtute hamṭhatna an ngaihtuah tur thu leh kohhrante nen pawh MoU an ziah tawh thu tarlan a ni tih sawiin, "Phûr taka hma lam an pan mek laiin, Cabinet Sub-Committee chuan thutlukna lungchhiatthlak tak mai a siam ta thut a, grape chíngtute tan chuan 'Chem loa lu lâk' a tling a, hlim taka nuihtir ṭhintu an huante chu ṭah tichhuaktu a chang zo ta a ni," a ti.
Grape chìn chuan thatchhiatna leh dâwngdahna a ûm bo tih sawiin Lalduhoma chuan, "Ṭhalaite rilruah rual elna leh taimakna a pe a, an in leh loah hmuh theihin hmasawnna a thlen a, thingtlang loneih bànsan tihlawhtlingtu a ni," a ti a; Hnahlan khuaah chuan chhungkua 20-30 bak lo nei an awm tawh loh thu a sawi.
ZLP Leader chuan, ZPM chu kut hnathawktute ṭhian a nih angin, grape chíngtute natnaah an na ve tih sawiin, "Thinlung takin kan tawrhpui. Sorkar hriatpuina ngeia hma la an ni a, sorkar sum pawh tam tak sen a ni tawh a, warning inpe miah loa hetia barakhaih thut an ni ta mai hi hriatthiampui harsa kan ti a ni," a ti.