KHAWTHLIR

Larsapin lawmpui
Governor Dr Hari Babu Kambhampati chuan nimin khan Asian University for Women, Chittagong, Bangladesh-a lut tur Syngenta Scholarship awardee Hmangaihzuali d/o H Lalbiakthanga, Thingsul Tlangnuam chu Raj Bhawan-ah thingpui an inpui a, lawmpuina thilpek a hlân. Switzerland-a hmunpui nei Syngenta hian Asian Women University-a lut tur zirlai panga zirna senso zawng zawng tum turin scholarship a pe dawn a ni.

YMA-in ṭanpui
Tuikual South Branch YMA chuan an din champha vawi 33-na pualin nimin khan an venga home pahnih - Salvation Army enkawl Motherless Babies Home leh Tuikual Presbyterian Kohhran enkawl Tuikual Rescue Centre-ah ṭanpuina buhfai, alu, artui leh dailuah ṭhahnem tak an hlan a; an venga damlote an kan bawk. Kum 1959-a din Tuikual Branch YMA chu Tuikual North Branch leh Tuikual South Branch-ah ṭhen a ni a, Tuikual South Branch chu February 9, 1989 khan din a ni a, member 3,000 vel an awm mek.

Heroin no. 4 man
8th Assam Rifles leh Champhaia Customs department mite chuan nimin khan Champhai Venglaiah heroin no. 4 gram 751.2 leh a neitua puh mi pakhat an man. Heroin hi Rs 3,00,48,000 mana chhût a ni a, a kawltu nen Champhaia Excise & Narcotics department hnenah an hlàn a ni.

Ruahmanna pawm
Sports & Youth Services (SYS) minister Robert Romawia Royte hoin nimin khan SYS department leh TATA Trusts aiawhte'n Mizoram district 11-a football centre 60 kalpui dan tur leh coach training dan tur an sawiho. Ṭhutkhawmah hian football zirna project atana cheng nuai 80 hman dan tura rua­hmanna an pawm a ni.

Fimkhur ngai
February 1, 2022-a tualthah thubuaia man tanker handyman Nripen Singh (50), Dholai, Assam chu nimin zing khan Central Jail-ah inâwk hluma hmuh a ni a, postmortem a nih hnuah an khuaah thawn a ni. Silchar Mizoram House aṭanga thu dawn danin, Nripen Singh thihna avang hian nizan dar 6 thleng khan Dholai lamah buaina a awm lo a, chuti chung chuan zin veivâkte chu fimkhur tura ngen an ni.