Kuhva smuggler Abu Mazumdar hi Mizoram CM team zinga mi a ni - BJP

BJP, Mizoram Pradesh chuan thuchhuah siamin, November 25, 2021 zana Assam House, New Delhi-a Mizoram chief minister Zoramthanga leh Assam chief minister Himanta Biswa Sarma ten zanriah an kîlhonaa tel ve Abu Mazumdar chu CM Zoramthanga team (ṭawiawmtu) a nih thu an tarlang.

Mizoram leh Assam chief minister-te zanriah kil dunnaah kuhva tawlh rutu Abu Mazumdar a tel ve chungchanga Mizoram Chief Minister's Office leh MNF party-in Mazumdar chu Assam CM ṭawiawmtu nia an tarlan avangin Mizo mipuite'n thu dik an hriat an duh avangin hma an la zui tih BJP Mizoram Pradesh chuan an tarlang a ni.

Mizoram BJP chuan, Assam CM Office an bia a, Secretary to CM Jyanta Malla Barua, MLA, chu nimin khan an biak thu an sawi a, "Abu Majumdar hi Delhi inbiakna leh dinner neihhonaah Assam CM party zinga mi leh Assam CM team hruai ni loin, Mizoram CM party zinga mi a ni. Thlalakah pawh a chian thu BJP Mizoram hruaitute an rawn hrilh," an ti a; Abu Majumdar chu kuhva ro Mizoram aṭanga Assam-a tawlh ruk chungchanga Assam sorkarin man tuma an zawn mek a nih thu a rawn hrilh tih an sawi.

Abu Majumdar chu Assam VIP team zinga mi ni se, Assam sorkar hian man a tum an rin loh thu sawiin BJP chuan, "Abu Majumdar pawh tlanchhiain bihrûk a ngai lo ang tih hi kan ngaihdan a ni. Mizoram sorkar chu dan loa kuhva tawlh ruknaah a inhnamhnawih ngei a ni tih hei hian a tichiangin kan hria a, thu dik tak Mizo mipui min hrilh ṭhin turin kan hriattir a ni," an ti.