Covid-19 vangin 628 thi tawh

Nimin khan tlai dar 5 thlengin Mizoramah Covid-19 vangin mi pakhat a thi a, February 8, Thawhlehni zan khan mi pahnih an thi bawk. Mizoramah hripui vangin mi 628 an thi tawh a, kumin February thla bikah mi 18 an thi tawh.

February 8, Thawhlehni zan dar 7:45 khan Jason Zosangliana (35), Aizawl Venglai chu hripui vangin State Refferal Hospital-ah a thi a, natna dang nei tel a ni. Covid-19 vei a ni tih January 28, 2022 khan finfiah a ni a, January 31-ah SRH-ah dah luh a ni. Thawhlehni zan vek dar 8:33 khan Vanlalhluta (64), Seling chu SRH-ah a thi a, hripui vei a ni tih January 2, 2022 khan hmuh chhuah niin, January 7 aṭangin SRH-ah enkawl a ni.

Nimin zing dar 9:30 khan Zirkungi (60), College Veng, Aizawl chu SRH-ah hripui vangin a thi a, natna dang nei tel a ni. Covid-19 positive a ni tih January 29, 2022 khan hmuh chhuah a ni a, hemi ní vêk hian SRH-ah dah luh a ni.