Vawk lak luh khap zui zel rih

Khawzawl bawrhsap CC Lalchhuangkima hoin nimin khan sorkar hotu te, village council association leh Khawzawl Vawkpui Vulh Association hruaitute'n DC conference hall-ah vawk note man bithliah leh vawk lak luh chungchang an sawiho a; ASF léng dinhmun thlithlai a la ṭul avangin vawk lak luh khap chhunzawm an rél.

CC Lalchhuangkima chuan, district páwna vawk notê leh vawk sa thawn chhuak thei tur khawpa intodelh a duh thu sawiin, "District mipuite'n vawk vulh an uar a, mi náwlpuiin vawk notê an leia an vulh ve theih nan vawk note man sang lutuk tur vên a ngai," a ti.

Ṭhutkhawmah hian, vawk note man bithliah chungchangah, district ṭhenawma vawk note man thlirho a ni a, vawk chaw leh thil dang man sang zelah vawk note man tihsan chu thil àwm tak nia an hriat thu an sawi. Vawk note man chu Rs 7,000 aia sang lo leh Rs 7,000-a hralh tur vawk note chu ni 60 tala upa ni se, an ti.

Khawzawl district-a ran vulhte hri danna pek rûnpui (mass vaccination) kalpui tum mek a ni a; ASF léng dinhmun thlithlai a la ṭul avang leh AH&Vety department thurâwn angin, district páwn lam aṭanga vawk lak luh khap chhunzawm rih ni se, an ti bawk.

Ṭhutkhawma tarlan danin, ASF avangin Khawzawl district-ah hian vawk 1,024 a thi a, Khawzawl khawpui bikah vawk 624 a thi a ni.