Property Tax return a inzâta insem rêl

Aizawl Municipal Corporation Ward XIX Committee chu a vawi khat nan February 8, Thawhlehni khan Saikhamakawn YMA Rún-ah an ṭhukhawm a, bialtu councillor Baryl Vanneihsangi hoin bial chhunga AMC Property Tax return sum hman dan tur an rêl a; AMC term kal laia property tax return hmasa ber a nih angin veng tinah a inzata sem an rêl.

AMC dânin a sawi angin, Property Tax return hman dawnah Ward Committee a kaltlang ngei tur a ni a, 80% chu hnathawh nan leh 20% chu a ṭul anga ward mamawh leina tura dah tur a ni.

Ward Committee chairman Baryl Vanneihsangi chuan, AMC inthlan laia an auhla angin Ward Committee an ngai pawimawh hle tih a sawi a, "Ward-XIX chhunga chengte'n ward fund leh property tax return-te rualkhai takin an dawng ang tia kan sawi ang takin kan kalpui a, veng duhsak bik leh hlamchhiah bik kan nei dawn lo. Ka intiam tawh angin ward chhunga veng parukah sem tur awm apiang sem rual zel a ni ang," a ti.

Baryl Vanneihsangi chuan, mipuiin Property Tax return hman chhuah lehna an hriat loh ṭhin avangin chhiah pe ṭha duh lo an awm ṭhin tih sawiin, mipuiin chhiah an pek ṭhat theih nan a hmangtu turte'n dik leh langtlang taka an hman a ṭul thu leh Aizawl khawpui a changtlun lehzual theih nan property tax pek ṭhat a, property tax return pawh hman ṭhat a pawimawh thu a sawi bawk.

Ward XIX-ah hian local council (LC) paruk - Kulikawn, Tlangnuam, Tlangnuam Vengthar, Saikhamakawn, Melthum leh Hlimente a awm a; Ward Committee-ah hian LC tin aṭangin member pahnih ṭheuh leh prominent citizen member pathum an tel a, Committee secretary atan Zoremtluanga, Kulikawn LC vice chairman an ruat a ni.