Mizoram mipui 17.31%-in hripui vei tawh

February 8, Thawh­lehni khan Mizoramah Covid-19 vei mi 1,806 hmuh chhuah a ni a, swab sample endik zat aṭanga positive zat (positivity rate) chu 23.70% a ni. Mizoramah Covid-19 positive 1,89,915 hmuh chhuah a ni tawh a, kum 2011 chhiarpuia Mizorama mihring awm zat 10,97,206 aṭangin 17.31% a tling.

Nimin khan hripui vei enkawl mek zinga dam tawh mi 2,167 chhuahtir an ni a, Covid-19 vangin mi pakhat a thi thung.

Covid-19 vei February 8-a hmuh thar mi 1,806-te chu mipa 799 leh hmeichhia 1,007 an ni a; RT-PCR labortatory-a hmuh 407, TrueNAT hmanga hmuh 146, RAT hmanga hmuh 1,237 leh FIA hmanga hmuh 16 an ni. February thla chhungin hripui vei mi 14,893 hmuh a ni tawh.

Mizorama sample endikna district 11 zinga district 10-ah positivity rate 10% chung lam a ni a, Kolasib district-ah chiah 10% a tling lo. Positivity rate sanna ber Champhai district-ah 49.54% a ni a, 20% aia a sànna district dang pasarih a awm. Posivity rate hi January 22, 2022 aṭangin 20% chung lam vek a ni.

Nimin tlai dar 5 thleng khan hripui vei dam tawh mi 2,167 chhuahtir an ni a; district tina chhuak zat chu - Aizawlah mi 1,348, Lungleiah 244, Kolasib-ah 165, Mamitah 152, Champhaiah 80, Serchhipah 60, Khawzawlah 42, Saitual leh Hnahthialah 29 ve ve, Lawngtlaiah 12 leh Siahaah mi paruk an ni.

IDSP record angin, Mizoramah Covid-19 vei 1,89,915 hmuh chhuah a ni tawh a, mipa 89,384 leh hmeichhia 1,00,531 an ni a, mipa aiin hmeichhia 11,147-in an tam zawk. Nimin tlai dar 5 thleng khan mi 1,78,071 (93.76%) chhuahtir an ni tawh a, mi 628 (0.33%) thi tawhin, enkawl mek mi 11,216 (5.91%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,89,915 chu mi 1,000 zelah hripui vei mi 173 an awm ang a ni a; mi 1,00,000 zela Covid-19 vangin mi 57 an thi tawh ang a ni tih sorkar thuchhuakin a tarlang.

Mizoramah February 8, 2022 thlenga swab sample endik tawh 17,30,013 aṭanga RT-PCR hmanga endik zat percentage chu 20.65 a ni a, RAT hmanga endik zat chu 73.66% a tling.