Hna kan thawh theih dawn loh chuan sorkarin min chhawmdawl rawh se - MIMA

Sumdawng pâwl hrang hrang inzawmkhawmna Mizoram Merchant Association (MIMA) chuan thuchhuah siamin, Covid-19 laka invenna leh inkaihhruainate hmang reng chunga hna thawh an duh tawh thu an tarlang a, "A nih loh chuan sorkarin min chhawmdawl rawh se," an ti.

MIMA chuan, Covid-19 an tawrh viau lohna atan sorkarin lockdown vawi tam tak an puang tawh tih sawiin, "Kum 2020 aṭang khan sumdawng ṭhenkhatte chuan ngai awh chu sawi loh, chawi belhin kan kal ngar ngar a ni," an ti a; dawr an hawn theih chhunah pawh inhralh a har avangin an khâr chhunga an chawite an hmu let pha lo hle niin an sawi.

March 2021 aṭanga Covid thawh hnihna a len aṭanga tun thlengin hna an thawk mumal theih loh avangin sumdawngte'n an tuar nasa hle tih sawiin MIMA chuan, "Lak luh awm si loin dawr luah man, kudam luah man leh bill chi hrang hrang, electric bil, tui bill, naupang fee, adt. pek a ngai reng tho a ni," an ti.

MIMA chuan, an ni tin ei leh bâr bakah, dawra an mi chhawrte dinhmun ngaihtuah nen, an sum khâwlte hman zel loh theih loh a nih thu sawiin, "Kan neihin a tlin ta lo a, mangangin kan rûm a, mahni inveng chunga eizawn kan duh a ni," an ti a, dawr khâr chu hri dona tlinga an ngaih loh thu an tarlang.

Sumdawng pawlte chuan, mi ṭhenkhat chu mangangin an rûm tlawk tlawk tawh thu tarlangin, "Kan tan dinchhuah leh ngaihna awm miah lo dinhmuna kan awm hma hian CAB leh SOP (hri hlau chung pawha hri laka invêng chungin)-te hmang renga hna thawh theih kan duh tawh. A nih loh chuan kan sorkar hian min chhawmdawlna tur tal ruahmanna siamin min chhawmdawl rawh se," an ti.