MZU-in UG exam result tichhuak ; Pass percentage 98.06 a tling
Mizoram University chuan under graduate odd semester exam result nimin chawhnu dar 2 khan a tichhuak a, zirlai exam mi 20,562 zinga 20,164 an pass a, pass percentage chu 98.06 a ni.
Under graduate first, third leh fifth semester exam hi Covid-19 léng avangin online hmanga kalpui leh a ni a, zirlai exam 20,562-te chu B.A., B.Sc., B.Com. leh B.Sc. (Home Science)-te an ni.
1st semester-ah zirlai exam 4,922 zinga 4,880 pass in, pass percentage 99.15 a ni a; 3rd semester-ah zirlai exam mi 7,090 zinga 6,968 (98.28%) an pass. 5th semester-ah zirlai exam mi 8,550 zinga mi 8,316 (98.06%) an pass bawk.
MZU controller of examination Prof. Lalnuntluanga chuan, MZU hnuaia exam result chu Covid-19 len hma aiin a ṭhat zawk thu leh online-a exam vang nia a lan thu a sawi a, "Covid-19 lên hma chuan pass percentage hi 60% - 70% inkar a ni tlangpui a, 80% hi a tling ngai lo hrim hrim. Online-a exam chuan 90% chung lam zel a ni," a ti.
Prof. Lalnuntluanga chuan, UG even semester exam chu kumin May thlaah neih a nih dawn thu sawiin, "Even semester exam hi chu offline ngeia tih kan tum a, college principal-te pawh kan sawipui tawh," a ti a; offline-a exam tir turin College Principal Council leh zirlai pawl lamte'n sorkarah an thlen tawh nia an hriat thu a sawi.
Prof. Lalnuntluanga chuan, MZU-in tluang taka exam result a puang ta chu lawmawm a tih thu sawiin, zirlai hlawhtlingte a lawmpui thu a sawi a, pass zo lote chu beidawng mai lo a, ṭang sauh turin a chah.