CM-in Kamrula Chhangte leh a unaute hmingin hna a thawk char char - MPCC Treasurer

MPCC treasurer Zodintluanga Ralte chuan Mizoram chief minister Zoramthanga chu sum atchilh leh sum hmuhna tura khaw eng pawh zah zo loah puhin, tunah hian Kamrula Chhangte leh a unaute hmingin hna tam tak a thawh mek thu a sawi.

Zodintluanga hian he thu hi nimina Mara District Congress Committee (MDCC)-in Siaha Bazara vantlang inkhawm an buatsaihah a sawi.

MPCC Treasurer chuan, MNF kaihhruai sorkarin mipui a sáwr fû nasa nia sawiin, "Tui bill leh electric bill an tipung reng a, mipui tan hmasawnna a awm thei tawh lo. Mipui hi sàwr fû tur kan awm tawh lo. An hotupa berin a chhungkhat hnaite hna lian ber berin a vûr a, chuvangin, minister leh MLA-te pawhin mahni inhâivûr an ngaihtuah ta ringawt mai a ni," a ti.

Chief Minister sawi tam ber rua/mau chìnna hmun a en thu sawiin Zodintluanga chuan, "A chíngtute an beidawng a, kuhvate'n an lo thlak tawh a ni. Sum siam nan ringawta rua/mau hman hi a beidawnthlak. Engati nge SEDP programme-ah CM âtchilh bur mau/rua an telh loh le?" a ti a; sorkar hnathawk leh minister-te'n mau/rua chu an ring tâwk ve lo a nih hmel thu a sawi.

MPCC Treasurer chuan, SEDP hnuaia sorkarin a sem tur khawia sum nge tih an la sawi loh thu sawiin, "Nikum budget-ah an dah lo. Vawiinah lo vah a ni a, thlai chìn a hun vek tawh. An sem tura pawh an la thlang mumal thei lo. Inthlan dawn apianga mipui bum nan SEDP hi an hmang mai a ni tih Serchhip leh Tuirial by-election-ah kan hmu tawh," a ti.

MPCC tarlan danin, inkhawmah hian MPCC Treasurer-in MADC MDC pahnih - Hrangchuanga (dy. chief whip) leh KH Beihlo (executibe member) te chu an party-ah a lawmlut a ni.