Taxation dept.-in target an khûm tawh

Taxation department chuan sorkar kum kal mekah January 2022 thleng khan chhiah chi hrang hrang aṭangin Rs 7,33,18,07,869.65 a hmu tawh a, kum 2021-22 Mizoram budget (estimate)-in Taxation depart­ment sum hmuh zat tura a bituk an khûm tawh.

Kum 2021-22 budget estimate-ah Mizoramin chhiah aṭanga sum hmuh a beisei chu cheng vbc. 719.56 a ni a, chu'ng zinga vbc. 650 chu Taxation department lak luh tura ruahman a ni. Budget revised 2021-22 ah erawh chuan Taxation department-in an hmuh tura tuk zat chu cheng vbc. 717 a ni tawh thung.

Taxation minister Lalchamliana chuan, Taxation department-in chhiah hrang hrang aṭangin January 2022 khan Rs 1,21,39,52,417 a hmu tih Twitter-ah a tarlang. Taxation department hian sorkar kum kal mekah April-December 2021 chhung khan Rs 6,11,78,55,452.65 an hmu a, Taxation Minister-in a tarlan, January 2022 chhunga an hmuh Rs 1,21,39,52,417 nen sorkar kum kal meka January 2022 thlenga an hmuh zat chu Rs 7,33,18,07,869 a ni.

Budget estimate 2021-22 chhunga Taxation department chauh ni loin, department hrang hrang aṭanga Mizoramin chhiah a hmuh zat tura chhût (target) cheng vbc. 719.56 chu thla 10 (April 2021 - January 2022) chhunga Taxation department-in a hmuh ringawt pawhin a khum tawh a ni. Hetih lai hian, sorkar kum tàwp nan thla hnih, February leh March a la awm.