Serchhip damdawi-ina thil thleng Medical lamin an chhui leh mek

Serchhip District Hospital-a mi pahnih thihna chungchang chhui tura ruat Serchhip DC kal chhuak ta Kumar Abhishek-a'n a chhui zawh hnuah, rawtna a siam angin medical lama mithiamte'n an chhui leh mek.

Serchhip District Hospital-a thil thleng chungchanga magisterial inquiry titu Kumar Abhishek chuan January 2022 laihâwl vel khan a report sorkarah a thehlut a ni.

Vanglaini palai zawhna chhangin Health secretary R Lalramnghaka chuan, magisterial inquiry report chu zir chian a nih tawh thu sawiin, "A chhui chiangtuin medical kaihhnawih laite medical lam chhui chiantir leh a rawt angin chhui chiantir mek a ni a, report an rawn la thehlut lo," a ti.

Health Secretary sawi danin, medical lamin report an thehluh hnuah, magisterial inquiry report nen en zui a ni ang a, Serchhip District Hospital-a thil thleng chungchangah sorkarin a ṭul angin hma a la dawn a ni.

Tarlan tawh angin, Serchhip District Hospital-a nausén piang hlim thihna leh raicheha nu thihna leh a fa piang hlim thihna chungchang chhui chiang turin Serchhip Ṭhalai Pawl (SṬP) chuan December 6, 2021 khan Health minister Dr R Lalthangliana, bialtu MLA Lalduhoma leh Serchhip DC-te hnenah ngenna an thlen.

SṬP tarlan danin, October 29, 2021 tlai dar 3:30 khan Vanlaldinpuii w/o Robert K Vanlalchhuanga, Sialsir khuain Serchhip District Hospital-a naute a hrin chu a tûk October 30 zan dar 8:30-ah a thi a ni. Nausén thi hi damdawi-ina thawkte’n an ngaihsak ṭha tâwk lo nia an hriat thu, a chhungte’n an thehdarh bakah, nausen na tuar lai video social media-ah thehdarh a ni.

Sialsir nausén thih aṭanga ni 34-na, December 3, 2021 zan khan Serchhip District Hospital-ah vêk Malsawmkimi w/o Zaithankima, Tlangpui khua chu nau chungah a thi a, a nau hrin pawh a thi nghal. He thihna thleng chungchangah hian mitthi chhungte chuan thawktute inthlahdah vangah an ngai a ni.